Ўзбекистонда коронавирус қайд этилиш кўрсаткичи секин-аста ортиб бормоқда. Бу ҳақда АОКАда бўлиб ўтган брифингда Коронавирусга қарши кураш штаби аъзоси Нурмат Отабеков маълум қилди.
Фото: «Дарё»
«Коронавирусга қайд этилиш кўрсатгичи мамлакатимизда ҳам секин-аста ортиб бормоқда. Охирги 3 ой давомида касалликнинг қайд этилиш даражаси ҳар юз минг аҳолига 0,2 кўрсаткичда бўлган бўлса, охирги 3-4 кун мобайнида бу кўрсаткич 0,4 га кўтарилди.
Касаллик аниқланганларнинг аксарияти беморлар билан бевосита мулоқотда бўлиш орқали касалликни юқтириб олган.
Ҳозирги кунда COVAX дастури доирасида вакциналарнинг муайян қисми етиб келди. Вакциналар билан аҳолини эмлаш учун барча тайёргарликларни кўриб қўйганмиз. Маҳаллий ҳудудларда маҳаллий мутахассислардан иборат штаблар ташкил этилган.
Барча вилоятларда эмланиши керак бўлган аҳоли қатламининг электрон базаси, яъни уларни электрон рўйхатга олиш тизими амалга оширилмоқда. Улар эмлангандан сўнг бу базада эмланганлик ҳақида маълумотни кўриш мумкин», – дейди Нурмат Отабеков.
Маълумот учун, Ўзбекистонда 18 март ҳолатига кўра, бир сутка ичида 124 кишида коронавирус аниқланди. Бу йил бошидан буён қайд этилган суткалик рекорд ҳисобланади.
Мавзуга доир:
Эслатиб ўтамиз, 14 март куни Ўзбекистонда декабрдан бери биринчи марта бир кунда 111 кишида, 16 март куни эса Ўзбекистонда бир сутка ичида 115 кишида коронавирус аниқланган эди.
Бундан ташқари, Тошкент шаҳридаги такси ва қурилиш соҳасида карантин чоралари кучайтирилиши, пойтахт ҳокимлиги ва унинг тизимидаги барча тузилмаларда турли йиғилишларни ўтказиш тақиқлангани ҳақида хабар берилган эди.
Коронавирус кенг тарқалишининг олдини олиш мақсадида Тошкентдаги айрим мактабларда ўқиш босқичма-босқич масофавий шаклга ўтказилмоқда, бозор ва савдо марказларида карантин талаблари кучайтирилди.
Бундан аввал Сирдарёда сўнгги икки кун ичида мингдан ортиқ киши карантин қоидаларини бузгани аниқлангани ҳамда Ўзбекистоннинг қатор вилоятларида карантин қоидаларини бузганларни жавобгарликка тортиш ҳолатлари кўпайгани ҳақида хабар берилганди.
