Наманган шаҳрининг Давлатобод туманида «Янги Ўзбекистон— ёшлар зиё маскани» кутубхонасининг очилиш маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Янги кутубхонанинг умумий майдони 5220 квадрат метрни ташкил этади. Бино 3 та қават, архив ва фонд сақлаш учун мўлжалланган ертўладан иборат. Бу ерда бир вақтнинг ўзида 1200 кишига хизмат кўрсатиш мумкин.
«Кутубхона 30 мингдан ортиқ бадиий ва илмий адабиётлар, ўқув қўлланмалари билан таъминланди. Келгуси 3 йилда китоблар сонини 100 мингтага олиб чиқиш режалаштирилган», — дейди кутубхона директори Дилноза Азизова.
Бинонинг биринчи қаватида болалар майдончаси ташкил этилган бўлиб, бу ерда улар учун мўлжалланган жиҳозлар, ўйинчоқлар ва китоблар мавжуд.
Очилиш маросимида вилоят ҳокими Шавкатжон Абдураззоқов томонидан янги зиё масканига 1000 та илмий ва бадиий китоб совға сифатида топширилди.
Эслатиб ўтамиз, қуриш ва жиҳозлашда инновацион ёндашувлар татбиқ қилинган ушбу кутубхона олдинроқ ижтимоий тармоқларда кенг муҳокама ва эътирофларга сабаб бўлганди.
Изоҳ (0)