Интернет тармоғида Шайхонтоҳур туманида шубҳали пакет топилган бўлиб, унинг ичидаги нарса инсонлар учун хавфли эканлиги ҳақида маълумот тарқамоқда. Мазкур ҳолат бўйича шаҳар Ички ишлар бошқармаси маълумот берди.
Маълум қилинишича, 2021 йил 17 март куни соат 14:40 да Тошкент шаҳар ИИББ ходимларига Шайхонтоҳур тумани Кичик ҳалқа автомобиль йўлида жойлашган «Малика» савдо комплекси ҳудудида дўконлардан бирининг ёнида номаълум шахс томонидан қора рангли спорт сумкаси қолдирилгани ҳақида хабар келиб тушди.
Ички ишлар органлари, хусусан, Ўзбекистон Ички ишлар вазирлиги махсус бўлинмаси ходимлари жамоат хавфсизлигини таъминлаш мақсадида ҳудудни чегаралаб, сумкани кўрикдан ўтказди. Маълум бўлишича, сумка ичида қонунга хилоф ва инсон ҳаёти учун хавфли бўлган ҳеч нарса топилмаган.
Кўрилган тезкор тадбирлар давомида сумка Юнусобод туманидаги қурилиш объектда ёлланма ишчи бўлиб ишловчи 18 ёшли Ж.К. томонидан унутиб қолдирилгани аниқланди. Суҳбат давомида у савдо комплекси ҳудудига телефонини тузатиш учун келганини, сумкани эса дўкон олдида оғир бўлгани учун қўйганини, бу кимнидир қўрқитади деб ўйламаганини айтди.
Аввалроқ Чилонзор, Мирзо Улуғбек ва Яккасаройда ўғриликлар содир этишда гумон қилинган шахс қидирувга берилгани, Тошкентдаги кафеларнинг бирида 45 киши иштирокида оммавий муштлашув содир бўлгани ҳамда Тошкентда ўзини автомобиль йўли устидаги кўприкдан ташламоқчи бўлган 21 ёшли қиз қутқариб қолингани ҳақида хабар берилганди.
Изоҳ (0)