Internet tarmog‘ida Shayxontohur tumanida shubhali paket topilgan bo‘lib, uning ichidagi narsa insonlar uchun xavfli ekanligi haqida ma’lumot tarqamoqda. Mazkur holat bo‘yicha shahar Ichki ishlar boshqarmasi ma’lumot berdi.
Ma’lum qilinishicha, 2021-yil 17-mart kuni soat 14:40 da Toshkent shahar IIBB xodimlariga Shayxontohur tumani Kichik halqa avtomobil yo‘lida joylashgan “Malika” savdo kompleksi hududida do‘konlardan birining yonida noma’lum shaxs tomonidan qora rangli sport sumkasi qoldirilgani haqida xabar kelib tushdi.
Ichki ishlar organlari, xususan, O‘zbekiston Ichki ishlar vazirligi maxsus bo‘linmasi xodimlari jamoat xavfsizligini ta’minlash maqsadida hududni chegaralab, sumkani ko‘rikdan o‘tkazdi. Ma’lum bo‘lishicha, sumka ichida qonunga xilof va inson hayoti uchun xavfli bo‘lgan hech narsa topilmagan.
Ko‘rilgan tezkor tadbirlar davomida sumka Yunusobod tumanidagi qurilish obyektda yollanma ishchi bo‘lib ishlovchi 18 yoshli J.K. tomonidan unutib qoldirilgani aniqlandi. Suhbat davomida u savdo kompleksi hududiga telefonini tuzatish uchun kelganini, sumkani esa do‘kon oldida og‘ir bo‘lgani uchun qo‘yganini, bu kimnidir qo‘rqitadi deb o‘ylamaganini aytdi.
Avvalroq Chilonzor, Mirzo Ulug‘bek va Yakkasaroyda o‘g‘riliklar sodir etishda gumon qilingan shaxs qidiruvga berilgani, Toshkentdagi kafelarning birida 45 kishi ishtirokida ommaviy mushtlashuv sodir bo‘lgani hamda Toshkentda o‘zini avtomobil yo‘li ustidagi ko‘prikdan tashlamoqchi bo‘lgan 21 yoshli qiz qutqarib qolingani haqida xabar berilgandi.
Izoh (0)