Сирдарё вилоятида сўнгги икки кун ичида мингдан ортиқ фуқаро карантин қоидаларини бузиш ҳолати юзасидан огоҳлантирилди. Бу ҳақда Сирдарё вилояти ИИБ ахборот хизмати раҳбари, майор Достон Шамсиддиновга таяниб «Postda.uz» хабар берди.
Достон Шамсиддиновнинг таъкидлашича, кейинги пайтда фуқароларнинг карантин қоидаларига риоя қилишга бўлган эътибори сусайгани қайд этилмоқда. Айниқса, жамоат жойларида масофа сақламаслик, тўй ва бошқа оммавий тадбирларни ўтказиш бўйича белгиланган тартибни бузиш, ниқоб тақмаслик каби ҳолатлар кўп учрамоқда.
Сирдарё вилоят ички ишлар органлари ходимлари томонидан 103 та шундай ҳолат юзасидан маъмурий баённома расмийлаштирилган.
Аввалроқ Ўзбекистоннинг қатор вилоятларида карантин қоидаларини бузганларни жавобгарликка тортиш ҳолатлари кўпайгани ҳақида хабар берилган эди. Коронавирус билан касалланиш даражаси ортгани сабаб 16 мартдан ҳуқуқ-тартибот органлари аҳоли ўртасида карантин қоидаларига риоя қилиш ва ниқобларни тақиш зарурати бўйича тарғибот ишларини кучайтирган.
Эслатиб ўтамиз, Маъмурий жавобгарик тўғрисидаги кодекснинг 54-моддасида эпидемияларга қарши кураш қоидаларини бузганлик учун жавобгарлик чоралари белгиланган. Ушбу моддага кўра, карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш — базавий ҳисоблаш миқдорининг 5 бараваригача (1 миллион 225 минг сўм) миқдорда жарима солишга сабаб бўлади.
Изоҳ (0)