Тошкентда «Тошкент шаҳар сув таъминоти» директори ўринбосари ва бўлим бошлиғи 3 миллион сўм пора олаётганда ушланди, дея хабар бермоқда Ички ишлар вазирлиги матбуот хизмати.
Қайд этилишича, 16 март куни ИИВга фуқаро А.Э. ариза билан мурожаат қилган. У тадбиркорлик қилиш мақсадида Юнусобод тумани Марказ-6 даги бекатни ижарага олган ва бекатга ўтган сув қувурига уланиб, ҳисоблагич ўрнатган ва ҳужжатлаштириш учун Тошкент шаҳар «Сувсоз» бошқармасига мурожаат қилган.
Корхонанинг М. исмли ходими сув қувурини ўзбошимчалик билан улаганини рўкач қилиб, жаримага тортмаслик эвазига 3 миллион сўм беришини талаб қилаётганини маълум қилиб, унга нисбатан қонуний чора кўришни сўраган.
Шу куни ИИВ ЖҚББ Коррупция ва иқтисодий жиноятларга қарши курашиш бошқармаси ҳамда Бош прокуратура ҳузуридаги ИЖҚК Департаменти Тошкент шаҳар Юнусобод тумани бўлими ходимлари ҳамкорлигида ўтказилган тезкор тадбир давомида, «Тошкент шаҳар сув таъминоти» МЧЖ бўлим бошлиғи Ҳ.М. Тошкент шаҳар Учтепа ҳокимлиги яқинида ариза муаллифи А.Э. дан 3 миллион сўм олган вақтда ашёвий далиллар билан ушланди.
Ушланган шахс ушбу пулларни «Тошкент шаҳар сув таъминоти» МЧЖ директор ўринбосари П.Р.нинг топшириғига асосан олганини ва пулларнинг бир қисмини унга бериши лозимлигини маълум қилган.
Шундан сўнг, 17 март куни тезкор тадбир давом эттирилиб, П.Р. хизмат хонасида Ҳ.М.дан 3 миллион сўм миқдоридаги пуллардан, 1 миллион 800 минг сўмини олган вақтда ашёвий далиллар билан ушланди.
Мазкур ҳолат юзасидан 2021 йил 17 март куни Бош прокуратура ҳузуридаги ИЖҚК Департаменти Тошкент шаҳар Юнусобод тумани бўлими томонидан Жиноят кодексининг 210-моддаси 2-қисми «г» банди (бир гуруҳ мансабдор шахслар томонидан олдиндан тил бириктириб пора олиш) билан жиноят иши қўзғатилиб, П.Р. ва Ҳ.М. Жиноят процессуал кодекснинг 224-моддаси тартибида ушланганлар. Жиноят иши юзасидан тергов ҳаракатлари олиб борилмоқда.
Суд томонидан улар 210-моддаси 2-қисми «г» банди билан айбдор деб топилса, беш йилдан ўн йилгача озодликдан маҳрум қилиниши мумкин.
Бундан аввал Тошкент вилоятида автомашинасини жарима майдончасидан чиқариб беришни сўраб, ЙПХ ходимига 5 млн сўм пора таклиф қилган ҳайдовчи қўлга олингани, Навоийда тадбиркорга тегишли ерни 150 минг долларга сотишга уринган шахс ушлангани ҳамда Самарқандда фуқарони «аёллар дафтари»га киритиш учун 500 доллар талаб қилган маҳалла раисига жиноят иши қўзғатилгани ҳақида хабар берилганди.
Изоҳ (0)