Ўзбекистонда қидирувда бўлган шахс Россияда қўлга олинди

Ўзбекистонда бир неча ойдан буён қидирувда бўлган эркак Санкт-Петербургда қўлга олинди.

«Fontanka.ru»нинг Россия Ички ишлар вазирлигининг Санкт-Петербург ва Ленинград вилояти бўйича бош бошқармаларига таяниб хабар беришича, 25 ёшли ушбу фуқаро 2020 йилнинг ёзида бир неча шахс билан бирга озиқ-овқат дўкони эгасига таёқ ва биталар билан ҳужум қилган.

Ҳодисанинг деярли барча иштирокчилари зудлик билан қўлга олинган. Фақат 25 ёшли У.Т. Россияга қочиб кетишга улгурган. Петербургда у қурилишларда монтаж ишларини бажариб, кун кўрган.

У.Т. Санкт-Петербург жанубидаги хонадонларнинг бирида ижарада яшаган ва шу ерда 17 март куни «Гранит» махсус тезкор отряди томонидан қўлга олинган.

Қўлга олинган фуқаро ҳудудий полиция бўлимига келтирилган. Айни пайтда уни Ўзбекистонга экстрадиция қилиш масаласи кўриб чиқилмоқда.

Аввалроқ Санкт-Петербургда 29 ёшли ўзбекистонлик аёл ўлдириб кетилгани, қотилликда 22 ёшли ўзбекистонлик йигит гумонланиб, қўлга олингани ҳақида хабар берилган эди.