Ҳар бир аёл гардеробидан ўрин олиши керак бўлган 12 та кийим

Кийим жавонингизда бўлиши керак бўлган, урфдан қолмайдиган 12 та нарса ҳақида маълумот берамиз.

Тренчкот

Қаймоқранг тренчкот ҳар қандай кўринишга мос келади. Агар сиз ҳали  бундай либос олмаган бўлсангиз, қимматбаҳо тренчкотга пул сарфлашнинг ҳожати йўқ — сифатли моделларни ўртача нархлардаги брендларда ва ҳатто иккинчи қўл дўконлардан ҳам топиш мумкин.

Эркакларникига ўхшаш оқ кўйлак

Бундай кўйлак нозик жинс вакилларини қатъиятли қилиб кўрсатади. У нафақат жинси шим билан, балки шифон кўйлак билан ҳам ажойиб комбинация ҳосил қилади.

Нақш ва ёзувларсиз оқ футболка

Оқ футболкани жинси шим ва оқ кроссовка билан мослаштириб, кундалик образ яратиш мумкин. Бундай образ соддалиги билан ажралиб туради, аммо энг кўп фойдаланиладиган замонавий комбинациялардан биридир.

Жинси шим

Ҳар бир аёл жинси шимнинг қайси модели унга мос келишини билиши ва гардеробида камида бир жуфт жинси шими бўлиши керак. Ёдингизда бўлсинки, классик текис жинси шимлар ҳар қандай қоматга мос келади.

Қулай пошнали туфли

15 сантиметрлик пошнали туфлида юришни хоҳласак ҳам, бу узоқ вақт кийишга ярамайди. Аммо баландлиги ўртача бўлган қулай туфлиларни ҳар куни кийиш мумкин. Улар қора ёки қаймоқранг бўлиши шарт эмас, энг муҳими қулай ва ўзингизга ёқса бўлгани.

Кроссовка

Спорт пойабзали тоифасига кирувчи кроссовкалар аллақачон кундалик пойабзалга айланган. Костюм-шим ва кечки либослар билан кроссовка кийиш урфга кирганига анча бўлган.

Тор бичимдаги шим

Бундай шимларни футболка, блузка, толстовка, куртка, кроссовка ва пошнали босоножкалар билан ҳам бемалол кийиш мумкин. Умуман олганда, тор бичимдаги шимлар универсал кийим ҳисобланади.

Сумка

Сумкалар ёрқин рангли ёки қора, катта ҳажмли ёки кичик, монохром ёки турли ранглардан иборат бўлиши мумкин. Энг муҳим хусусияти шундаки, сумка эътиборни ўзига жалб қилади ва энг оддий образда ҳам акцентга айланиши мумкин.

Тўғри бичимли жакет

Бу либос ҳақида кўп марта ёзилган, аммо мода асосларини такрорлаш ҳеч қачон ортиқчалик қилмайди. Бундай бежирим жакет кундалик кийимнинг бир қисмини ташкил қилади.

Қора водолазка

Бу кийим нафақат 60 йилларда урфга кирган, балки ҳозир ҳам мини юбка билан ажойиб комбинация ярата олади. Муҳими, у юқори сифатли, идеал ҳолда эса кашмирдан бўлиши керак.

Ихчам услубдаги кўйлак

Кундалик услубингизга аёллик нафосатини қўшиш учун истак пайдо бўлганда кийиладиган либос. Бундай кўйлак содда, безакларсиз ва ён томонларида очиқ қирқимларсиз бўлиши лозим.

Телняшка

Сизда бундай кийимдан бир нечта нусха бўлса керак. Уни нима кийишни билмай, бош қотган вақтда юбка, шим, сарафан билан мослаштириш мумкин.