Одатда бир неча хил рангдаги кийимларни комбинациялашган ҳолда кўриш мумкин. Аммо унинг ҳам ўзига яраша қонун-қоидалари бор. Уларга амал қилинса, ҳеч қандай қийинчилик юз бермаслиги, шубҳасиз.
Гардеробда энг кўп қора ва оқ рангдаги либослар бўлиши табиий. Лекин эртами ё кеч бу каби бир хилликдан ҳар қандай инсон ҳам чарчайди. Улар янги ёки урфда бўлмасин, ҳеч нарсани ўзгартирмайди. Агар янги образ яратишда ёрқин рангли кийим кийишга дарҳол журъат етмаса, унда бу ишни аксессуарлардан бошлаш тавсия этилади.
Мураккаб тасвирга эга либослар ҳам маълум бир маънода мантиққа эга. Ранглар бир-бирини бойитади. Кийилган кийимлар комбинацияси уйғун бўлиб чиқиши учун аввалроқ ўйлаб ва синаб кўриш керак. Ишга ёки бошқа учрашувга 5 дақиқа қолганда кийимлар ўртасидаги рангларни бирлаштириш муваффақиятли кечмаслиги мумкин.
Шунингдек, кийимларда тасвирланган ранглар нафақат бир-бирига, балки унинг эгасига ҳам монанд бўлиши зарур. Ранглар одатда қоматни таъкидлаши, нуқсонларни яширишга хизмат қилиши керак. Аммо юқоридаги суратда свитернинг елка қисмидаги кўк ранг аёлнинг елкасини анча кенгайтириб, қизил пайпоқ эса оёқларни визуал тарзда қисқартирган. Шунинг учун ҳам ранглар нималарга қодир эканлигини аввал яхшилаб ўрганиб чиқиш керак.
Одатда кофта ва пойабзал ёки юбка ва сумка рангини мослаштириш одатга айланган. Бироқ доим ҳам бунга амал қилишнинг ҳожати йўқ. Сабаби шу тарзда имконият сезиларли даражада чекланиши мумкин. Янгилик олиб киришдан қўрқмаслик ҳамда турли хил тасвирларни синаб кўриш тавсия этилади.
Кийимлар ранги бир-биридан ташқари, мато турларига ҳам мос келиши муҳимдир. Кўпинча аёллар буни ҳисобга олмагани учун ҳам образда камчиликларга йўл қўяди. Гарчи ранглар уйғунликда бўлса-да, матолар бир-бирини бойитмаса, умумий тасвир тугал бўлмайди.
Образ яратишда аёлларнинг энг катта муаммоси – бу кулгили кўринишдан қўрқишдир. Шунинг учун улар мустақил ҳолатда ранг билан ишлашдан қўрқади ва доимий анъаналарга амал қилади. Одатий комбинацияларни афзал билади. Доимий қора ва оқ ёки кўзга ташланмайдиган классик ранглардаги кийимлар гардеробдан жой олади. Юқоридаги тавсияларни инобатга олган ҳолда ранг борасида янгилик яратишга уриниб кўриш лозим.
Мавзуга доир:
Изоҳ (0)