Шавкат Мирзиёев 18 март куни Тошкент вилоятининг Чиноз туманига келиб, сув хўжалигида амалга оширилаётган ишларни кўздан кечирди, деб хабар бермоқда Президент матбуот хизмати.
2021 йилнинг февралида Президент сув ресурсларини бошқариш ва ирригация секторини ривожлантиришнинг уч йиллик стратегияни тасдиқлаганди. Унда сув тежовчи технологияларни жорий қилишни кенгайтириш ва давлат томонидан рағбатлантириб бориш, бу соҳага хорижий инвестицияларни жалб этиш бўйича аниқ вазифалар белгиланган.
«Чиноз тумани Янгиобод қишлоғидаги экин майдони айнан шундай ишлар натижаси. Бу жойда 1 миллион 350 минг доллар инвестиция эвазига 850 гектар ер қайта ўзлаштирилган. Жами 202 минг куб метр сиғимга эга 3 та сув ҳавзаси барпо этилиб, экинларни томчилатиб суғориш йўлга қўйилган», — дейилади матбуот хизмати хабарида.
Янги қўриқ ернинг 702 гектарига қўшқатор усулда, плёнка остида «Андижон-72» навли пахта экилади. 148 гектарда экспортбоп полиз маҳсулотлари етиштирилади. Жумладан, унинг бир қисми ишсиз ёшларга бўлиб берилади.
«Экишдан олдин сотишни ўйлаш керак. Ерни тадбиркорга бериш зарур. Чунки у бозорни билади, рақобатни билади», — деган Шавкат Мирзиёев.
Маълум қилинишича, қайта фойдаланишга киритилган бу ерларда 220 киши доимий, 1 минг 200 дан зиёд аҳоли мавсумий иш билан таъминланади.
Изоҳ (0)