Санкт-Петербургнинг Красногвардейский туман суди миллий адоват сабаб 2019 йил сентябрь ойида Ўзбекистон фуқаросига қилинган ҳужум бўйича икки айбланувчини қамоқ жазосига ҳукм қилди, деб хабар қилди 15 март куни шаҳар судлари матбуот хизматига таяниб «Интерфакс».
Айбланувчи Владислав Смоликов беш йилга, унинг шериги Роман Кулев эса беш йил икки ойга озодликдан маҳрум этилди. Судланувчилар жазоларини қатъий режимдаги колонияда ўтайди.
Суд Смоликов ва Кулев славян кўринишга эга бўлмаган одамларга нисбатан адовати сабаб 2019 йил 17 сентябрга ўтар кечаси Среднеохтинский проспектидаги уйлардан бири ёнида ўзбекистонлик фуқарога аэрозол идиши ва сайёҳлик пичоғи билан ҳужум қилганини аниқлади. Жабрланувчи оғир аҳволда касалхонага ётқизилган.
Кулевнинг Москвадаги квартирасида тинтув ўтказилганида полиция рухсатномасиз сақланган отиш учун яроқли тўппонча топган.
Иш судга келганида, Смоликов ва Кулев қотилликка уринишда айбланган. Кейинчалик ҳибсга олинганларнинг хатти-ҳаракатлари «қасддан баданга оғир шикаст етказиш» моддаси бўйича қайта малакаланган.
«Интерфакс» манбасининг хабар беришича, жиноят содир этилган пайтда Кулевнинг ёши 24 да экани, Бауман номидаги Москва давлат техника университетининг олтинчи курс талабаси экани аниқланган. Смоликов 2019 йил сентябрь ойида 18 ёшга тўлган. У ҳеч қаерда ўқимаган ва ишламаган.
Бундан аввал Санкт-Петербургда 29 ёшли ўзбекистонлик аёл ўлдириб кетилгани, қотилликда 22 ёшли ўзбекистонлик йигит гумонланиб, қўлга олингани, Россия турли жиноятларда айбланган тўрт нафар шахсни Ўзбекистонга топширгани ҳамда халқаро қидирувда бўлган ўзбекистонлик эркак Россияда қўлга олингани ҳақида хабар берилганди.
Изоҳ (0)