Республика хотин-қизлар жамоатчилик кенгашининг 15 март куни ўтказилган биринчи йиғилишида Сенат раиси Танзила Норбоева аёлларнинг мардикор бозорлари ҳақида сўз юритди, дея хабар бермоқда «Дарё» мухбири.
«Мардикорлик билан шуғулланаётган аёлларимиз бор. Мардикорлик дейилади, лекин бу жуда хунук гап. Бир марталик иш дейлик. Мана шундай фаолиятга эҳтиёжи бор аёлларимиз мавжуд. Тошкент шаҳрининг ўзида 6 та кунлик ишчилар марказлари ташкил этилди. Республика бўйича эса жами 31 та.
Бу масалага ҳудудлардаги опа-сингилларимизнинг алоҳида эътиборини қаратмоқчиман. Сизлар (видеоконференц йиғилишда иштирок этган турли ташкилот вакиллари - таҳр.) бу масала Бандлик ва меҳнат муносабатлари вазирлигининг иши экан, деб қараб ўтирманглар. Яшаш ҳудудингиздаги бозор ёки кўчалар ёқасида аёллар ишчи кучимни сотаман, деб тўпланиб туришади. Мана шундай жойга ўзингиз боринглар, аёллар билан суҳбат қилинглар.
Аёллар кўчада ўз ишчи кучини таклиф қилиб туриши жуда хунук ҳолат. Бир марталик ишларни замонавий тартибда ташкил қилишимиз керак. Мавжуд кунлик ишчилар марказларининг ишлаб кетишини ҳам йўлга қўйиш зарур.
Вилоятларга хизмат сафари билан чиққанимда, албатта, ўша жойларга мен ҳам бораман. Бундай мардикор бозорлар Қўқонда, Тошкент шаҳри ва вилоятида кўп», — деди Республика хотин-қизлар жамоатчилик кенгаши раиси.
Мавзуга доир:
- Ўзбекистонда мардикорлар учун кунлик меҳнат марказлари ташкил этилиши мумкин
- Тошкентда барча хизматлар бепул кўрсатиладиган «Кунлик ишчилар маркази» очилди
- Танзила Норбоева мардикор аёллар ҳақида гапирди
- Қўйлиқдаги мардикор бозорига вилоятлардан келган 150 дан ортиқ аёл ишга чиқмоқда. Улар орасида ҳомиладорлар, ёш болалилар ва қизлар ҳам бор
Изоҳ (0)