Ҳиндистоннинг Раникхет провинциясидаги «Чаубатия» ўқув марказида Ўзбекистон ва Ҳиндистон ҳарбий бўлинмалари ҳамкорлигида «Дўстлик-II» қўшма машғулотлари бўлиб ўтмоқда. Бу ҳақда Мудофаа вазирлиги Ахборот ва оммавий коммуникациялар департаменти хабар берди.
Маълум қилинишича, ўқув машғулотлари давомида отиш майдонида икки давлат ҳарбий хизматчилари «иккилик» таркибида душманни яқин жангда йўқ қилиш бўйича амалий машғулотларни бажарган. Таъкидланишича, ўзбекистонлик ҳарбий хизматчилар ўқув машқлар давомида ўзларида мавжуд кўникмаларни ҳинд аскарлари билан бўлишган ҳамда яқин жангда душманни бошқа усулларни яксон қилиш амалларини амалий тарзда кўрсатиб берган.
Иккинчи ўқув нуқтаси — ўрмон шароитида эса икки давлат ҳарбий хизматчилари душманни қидириб топиш, уни аниқлаш ва йўқ қилиш бўйича амалий ҳаракатларни бажаришга киришган. Иккала давлатнинг аралаш таркибидаги бўлинмалари олдиндан яратилган вазиятга киритилиб, 1500 метрлик йўлакка жойлаштирилган турли хилдаги нишонлар (сунъий душман) ишғол қилинган.
Таъкидланишича, машғулотларни ўқув нуқталарида янада жанговар вазиятларга яқинлаштириш мақсадида Ҳиндистонда ишлаб чиқарилган ўқув қуроллари ва сенсорли нишонлардан фойдаланилган
«Куннинг биринчи қисмида машғулотларга якун ясалди, ҳарбий хизматчилар томонидан машғулотларни тўғри бажаришдаги устунлик ва йўл қўйилган камчиликларига алоҳида тўхталиб ўтилиб, тегишли хулосалар берилди», — дейилади хабарда.
Изоҳ (0)