Respublika xotin-qizlar jamoatchilik kengashining 15-mart kuni o‘tkazilgan birinchi yig‘ilishida Senat raisi Tanzila Norboyeva ayollarning mardikor bozorlari haqida so‘z yuritdi, deya xabar bermoqda “Daryo” muxbiri.
“Mardikorlik bilan shug‘ullanayotgan ayollarimiz bor. Mardikorlik deyiladi, lekin bu juda xunuk gap. Bir martalik ish deylik. Mana shunday faoliyatga ehtiyoji bor ayollarimiz mavjud. Toshkent shahrining o‘zida 6 ta kunlik ishchilar markazlari tashkil etildi. Respublika bo‘yicha esa jami 31 ta.
Bu masalaga hududlardagi opa-singillarimizning alohida e’tiborini qaratmoqchiman. Sizlar (videokonferens yig‘ilishda ishtirok etgan turli tashkilot vakillari - tahr.) bu masala Bandlik va mehnat munosabatlari vazirligining ishi ekan, deb qarab o‘tirmanglar. Yashash hududingizdagi bozor yoki ko‘chalar yoqasida ayollar ishchi kuchimni sotaman, deb to‘planib turishadi. Mana shunday joyga o‘zingiz boringlar, ayollar bilan suhbat qilinglar.
Ayollar ko‘chada o‘z ishchi kuchini taklif qilib turishi juda xunuk holat. Bir martalik ishlarni zamonaviy tartibda tashkil qilishimiz kerak. Mavjud kunlik ishchilar markazlarining ishlab ketishini ham yo‘lga qo‘yish zarur.
Viloyatlarga xizmat safari bilan chiqqanimda, albatta, o‘sha joylarga men ham boraman. Bunday mardikor bozorlar Qo‘qonda, Toshkent shahri va viloyatida ko‘p”, — dedi Respublika xotin-qizlar jamoatchilik kengashi raisi.
Mavzuga doir:
- O‘zbekistonda mardikorlar uchun kunlik mehnat markazlari tashkil etilishi mumkin
- Toshkentda barcha xizmatlar bepul ko‘rsatiladigan “Kunlik ishchilar markazi” ochildi
- Tanzila Norboyeva mardikor ayollar haqida gapirdi
- Qo‘yliqdagi mardikor bozoriga viloyatlardan kelgan 150 dan ortiq ayol ishga chiqmoqda. Ular orasida homiladorlar, yosh bolalilar va qizlar ham bor
Izoh (0)