«Auto.ru» сайтида 1980 йилда ишлаб чиқарилган «ЗИЛ-4104» лимузини сотувга қўйилгани тўғрисида эълон пайдо бўлди. Сотувчи мазкур автомобиль учун 8,9 миллион рубль (121 минг АҚШ доллари) сўрамоқда, бу пулга янги BMW 7-Series Long харид қилиш мумкин. Эълон сайтда ярим йилдан буён турганига қарамай, унга ҳали бирор харидор чиқмаган, деб хабар беради Motor.

Фото: «Auto.ru»

Мазкур лимузин 315 от кучига эга 7,7 литрли бензин двигатель билан жиҳозланган бўлиб, у уч поғонали автомат узатмалар қутиси ёрдамида бошқарилади. Эълон муаллифининг таъкидлашича, автомобиль ҳозирга қадар 48,2 минг километр йўл босган бўлиб, ҳеч қанақа харажат талаб қилмайди ва у «совға учун ажойиб вариант». Лимузин билан бирга у қўшимча янги мотор, янги трансмиссия ва орқа кўприкни совға қилишга тайёр.

Фото: «Auto.ru»

Етти ўриндиқли «ЗИЛ-4104» 1978 йилдан 1983 йилга қадар Лихачёв номидаги заводда йиғилган. «Auto.ru» сайтида худди шу каби, бироқ 1983 йилда ишлаб чиқарилган лимузиннинг сотувга қўйилганини ҳам кўриш мумкин, у 29 минг километр йўл босган. Мазкур машина 17 миллион рублга баҳоланмоқда — машина 2019 йилдан бери ўзига янги хўжайин қидиряпти.

Аввалроқ Горбачёв давридаги «ЗИЛ» лимузини янги Maybach нархида сотувга қўйилгани тўғрисида хабар берилганди.

Фото: «Auto.ru»

Фото: «Auto.ru»

Фото: «Auto.ru»

Фото: «Auto.ru»