General Motors ўйин приставкаси ўрнатилган автомобиль интерьери дизайнини намойиш этди

General Motors концерн дизайнерларидан бири томонидан яратилган интерьернинг компьютер эскизи билан бўлишди — унда автомобилнинг одатдаги қурилмалар панели ўрнини ўйин консоли эгаллаган, деб хабар беради Motor.

Автоном бошқарув технологияси ривожланиб бораётгани сабаб автомобиль дизайнерлари тез-тез машина интерьерини анъанавий бошқарув органларисиз тасвирлашга ўтди. Руль, тепкилар ва бошқа ричагларнинг йўқлиги сабаб вақтни мароқли ўтказиш мақсадида салонни турли гаджетлар эгалламоқда.

General Motors мисол сифатида концерн дизайнерларидан бири томонидан яратилган эскиз билан бўлишди — унда олд панел ўрнини тўлиғича телевизор эгаллаган — албатта, силжийдиган, унинг остида эса турли буюмлар учун бўш жой мавжуд. Шунингдек, телевизорга ўйин приставкаси уланган бўлиб, дизайнернинг фикрича, у автопилот тизими йўловчини белгиланган манзилга етказгунича вақтни ўтказишга хизмат қилади.

Аввалроқ Lexus компанияси Twitch сервиси геймерларининг хоҳишини инобатга олган ҳолда яратилган IS седанини намойиш этганди. Автомобильнинг шифт қисмига акрилли қоплама қопланган бўлиб, у ёмғир томчилари каби кўринишга эга ва турли рангдаги ёруғлик диодлари билан безатилган. Орқа ойнага исталган тасвирни чиқариш мумкин, ўйинга халақит бермаслиги учун қолган ойналарни қорайтириб қўйса бўлади.

Моделнинг асосий жиҳатида олд панелдаги эгилган дисплей бўлиб, унинг остидан силжийдиган геймерлар клавиатураси ўрин олган, ўйин ишқибозлари учун эса контроллер мавжуд. Юкхонага MSI Gaming GeForce видеокартасига эга кучли компьютер жойлаштирилган, ҳайдовчи ўриндиғи эса вибрация функцияси билан жиҳозланган.