«Лоло ва Пепе», «Мамонтчанинг онаси» ва бошқа севимли мультфильмлар ҳақида қизиқарли фактлар (видео)
Ҳаётдаги муҳим ва жиддий муаммоларни ўзида акс эттирган, қизиқарли сюжетга эга эканлиги билан телетомошабинларни экран қаршисига михлаб қўйган мультфильмлар ҳақидаги сиз билмаган маълумотларни эътиборингизга ҳавола этамиз.
«Мамонтчанинг онаси»
Ягона тирик қолган ва онасини топиш учун уринган мамонтча ҳақидаги мультфильм совет даврида катта бўлган болаларга яхши таниш. 1977 йил Россияда бундан бир неча минг йиллар аввал музлаб қолган мамонт боласининг қолдиғи топилган. Болалар ёзувчиси Дина Непомнайшаянинг мазкур ҳикояни ёзишига айнан шу воқеа туртки бўлган. Фожиавий якундан таъсирланган ёзувчи уни ўз ҳикоясида ўзгартиришга қарор қилган. Аввалига сюжет давомида қўшиқ бўлмаган. Кейинроқ мултипликаторлар истеъдодли композитор Владимир Шаинскийдан қўшиқ ёзиб беришни сўраган.
Мультфильмдаги қаҳрамон прототипи — қазилма ишлари давомида топилган мамонт боласи айни вақтда Россия фанлар академиясининг Зоология институти музейида «яшайди».
«Жажжи пингвин Лолонинг саргузаштлари»
Кадрларнинг сифатли экани билан ўзига хос бўлган, СССР ва Япония ҳамкорлигида ишланган мультфильм миллионлаб мухлислар қалбидан жой олишга муваффақ бўлган. Мини-сериал (3 қисм)нинг устида ишлаш учун 8 йил вақт кетган. Ҳамкорликда ишлаш таклифи японлардан чиққан, анимация СССРда ишланган, японлар ҳамкасбларини барча техник ускуналар билан таъминлаб берган. Картина нафақат Европа мамлакатлари, балки Араб Амирликлари, Австралия томонидан ҳам сотиб олинган.
Мухлислар ундаги пингвинларнинг ҳаётдагига мос эмаслигига эътибор қаратган, аммо мултипликаторлар мукаммал ўхшашлик эмас, ёрқин ва ўзига мафтун қиладиган тасвир устида иш олиб борган. Аслида пингвин болалари кул ранг тук билан қопланган бўлади, мультфильмда эса улар катталардек, камига ранг-баранг тасвирланган. Мультфильм сўнгида ҳикоячи Антарктидада куз март ойида тугаши ҳақида айтади, аслида эса Антарктидада куз мартда якунига етмайди, аксинча бошланади.
«Бўри ва бузоқча»
Ҳақиқий дўстлик ва муҳаббат қандай пайдо бўлиши ҳақидаги «Бўри ва бузоқча» мультфильми Ҳиндистон, Хорватия ва Аргентинада бўлиб ўтган кинофестивалларда кўплаб мукофотларга лойиқ деб топилган.
Кичкина бузоқча ва тулкига — Ольга Громова, катта бузоқ ва айиққа Владимир Винокур овоз берган. Бўрини эса Олег Табаков «гапиртирган». Мультфильмдаги кўплаб иқтибослар машҳур совет комедиялари сингари халқда тилдан тилга кўчган.
«Тулки ва ўрдак»
Дўстлик, ёрдамга шайлик ва ўз ҳаёти учун курашиш ҳақидаги мультфильм мултипликация классикаси деб аталади. 1948 йилда суратга олинган мультфильм 2001 йилда қайта ишланган ва овоз берилган. Сюжетда нозик психологик жиҳатларни акс эттирган картина танқидчиларнинг эътирофига, қайта ишланган вариант эса кўплаб танқидларга сабаб бўлган.
Дмитрий Мамин Сибиряк ҳикояси асосида яратилган мультфильмда китобдагидан фарқли ўлароқ, одам қаҳрамонлар бўлмаган. Бу телетомошабин ўзини қаҳрамонлар билан солиштира олиши учун амалга оширилган.
Мавзуга доир:
