«Уддалаб бўлмас топшириқ-7»га яна бешта янги актёр келиб қўшилди

Режиссёр Кристофер МакКуори ўзининг Instagram’даги саҳифаси орқали «Уддалаб бўлмас топшириқ» франшизасининг навбатдаги қисмига яна бешта актёр келиб қўшилганини маълум қилди, деб ёзади «Film.ru».

Фильмга келиб қўшилган янги актёрлар — Кэри Элвес («Жуда ғалати ишлар»), Марк Гатисс («Шерлок»), Чарльз Парнелл («Сўнгги кема»), Роб Дилэйни («Ҳалокат») ва Индира Варма («Тахтлар ўйини»).

Ушбу актёрлар айнан қандай ролни ижро этиши ҳозирча номаълум, бироқ суратнинг бирида Дилэйни ҳарбий кийимда тасвирланган, Элвеснинг суратида эса «Уюшмага хуш келибсиз» ёзувини учратиш мумкин. Студия янги актёрларни фақатгина еттинчи қисмда рол ижро этишига тасдиқлаган бўлишига қарамай, режиссёр суратларга #MI7MI8 хештегларини қўшган.

Эслатиб ўтамиз, «Уддалаб бўлмас топшириқ» франшизасининг еттинчи қисмини суратга олиш ишлари коронавирус пандемияси сабаб бир неча бор кўчирилган. Шунингдек, фильмнинг 2021 йил ёзига қолдирилган саккизинчи қисми устидаги ишлар еттинчисидан кейин дарҳол бошланади, чунки Том Круз «Топ Ган: Меверик» фильмининг промо-кампанияси билан банд бўлади.

«Уддалаб бўлмас топшириқ-7» премьераси 2021 йилнинг 18 ноябрида бўлиб ўтади.

Аввалроқ Том Круз «Уддалаб бўлмас топшириқ-7» фильмининг суратга олиш жараёнида аварияга учрагани маълум бўлганди.