Ўзбекистон Марказий банкининг Нақд пул муомаласи департаменти директори Фазлиддин Бозоров нақд пулларнинг ҳолати, улардан фойдаланиш, шунингдек, яқин орада 1000 сўмлик банкноталарнинг муомаладан чиқарилиши билан боғлиқ кўпчиликни қизиқтирган саволларга жавоб берди.
Фазлиддин Бозоровнинг таъкидлашича, Ўзбекистонда яқин орада 1000 сўмлик номиналдаги банкнотлар муомаладан чиқарилмайди. Унинг сўзларига кўра, 1000 сўм номинал қийматдаги банкнот 2001 йилда муомалага чиқарилган ва уларнинг аксарият қисми узоқ вақт давомида муомалада бўлгани сабабли уриниб қолган.
«Бунинг асосий сабабини ушбу пулларнинг бошқа йирикроқ номиналдаги банкнотларга нисбатан кўпроқ муомала жараёнига кириши, яъни қўлдан-қўлга ўтиши фаол бўлгани сабабли тез эскириши ҳамда шу ҳолатда, банкларга келиб тушмасдан аҳоли қўлида узоқ муддат қолиб кетиши билан изоҳлаш мумкин.
Бу қийматдаги банкнотлар ҳозирда ҳам босиб чиқарилмоқда ва талабдан келиб чиққан ҳолда муомалага киритиб борилмоқда. Бироқ бугунги кунда банкнотлар муомалага асосан банкоматлар орқали чиқарилаётгани ва банкоматлардан асосан йирик номиналдаги банкнотлар жойлаштирилиши сабабли 1000 сўмлик банкнотлар муомалада камайиб бораётгани ҳақиқат. Бу табиий жараён бўлиб, худди товарларга ўхшаб талаб камайса, банкнотлар ҳам муомаладан камайиб боради.
‘Банкоматларга 1000 сўмлик ҳам жойлаштирилса бўлмайдими?’ деган савол туғилиши табиий. Бўлади. Лекин банкоматлар сиғими чеклангани сабабли уларни бир марталик тўлдириш орқали имкон қадар кўпроқ аҳолига хизмат кўрсатиш имкониятига эга бўлиши, яъни жойлаштирилган пул тез тугаб қолмаслиги учун кўпроқ йирик қийматдаги банкнотлардан фойдаланилади. Нақд пулларни бевосита банк кассаларидан олганда, зарур ҳолларда бир қисмини 1000 сўмлик банкнотлар сифатида олиниши мақсадга мувофиқ», — дейди Марказий банк департаменти директори.
Бозоровнинг қайд этишича, Марказий банк доимий тарзда муомаладаги нақд пуллар қаторини оптималлаштириш, эскирганларини муомаладан қайтариб олиш ва уларнинг ўрнига янги банкнот ҳамда тангаларни муомалага киритиб бориш бўйича тизимли ишларни амалга оширмоқда.
Маълумот учун, ҳозирги вақтда ўзбек сўмининг энг катта қийматли купюраси 100 000 сўм ҳисобланади. Мазкур купюра 2019 йил 25 февралдан муомалага чиқарилган. Бундан ташқари, 1994 йилдан бери 1, 3, 5, 10, 25, 50, 100, 200, 500, 1000, 5000, 10 000 ва 50 000 сўмлик купюралар ҳам муомалага чиқарилган.
Изоҳ (0)