Овқатланиш организмнинг аҳволи ва ҳаёт тарзининг қандай кечишига таъсир қиладиган муҳим омиллардан бири саналади. Истеъмол қилинган маҳсулот ташқи кўриниш, фаоллик ва эмоционал ҳолатда ўз аксини беради. Вазн ортиши нафақат ҳазм жараёни, балки тери аҳволи ёмонлашиши, сочлар тўкилиши ва тирноқлар мўртлашишига олиб келади. Овқатланиш борасидаги соғлом одатлар эса бу каби муаммоларнинг олдини олибгина қолмай, бартараф этилишига ҳам ҳисса қўшади.
Овқатланишда меъёрни билинг
Меъёрга амал қилган ҳолда, ошириб юбормасдан овқатланиш керак. Бунинг учун порция ҳажмини аниқлаб олиш керак. Кафт катталигидаги порция сиз учун меъёр бўлади.
Овқатланиш режимини танланг ва унга риоя қилинг
Кун давомида нонушта, тушлик ва кечки овқатни қолдирмасдан ейиш керак. Орада енгил ва фойдали маҳсулотлар билан тамадди қилиб олса ҳам бўлади.
Рацион балансда бўлишига эътибор қаратинг
Оқсил, ёғ ва углеводларнинг етарли миқдорда бўлиши организмнинг тўлақонли фаолияти учун муҳим саналади. Кунлик рационда 30 фоиз оқсил, 30 фоиз ёғ ва 40 фоиз углевод бўлиши керак. Саломатлик ва вазн борасида индивидуал ўзгариш истовчилар парҳезшуносларга мурожаат қилиши керак.
Таомни сифатлисини танланг
Нимани қандай аҳволда истеъмол қилиш ҳам ўта муҳим. Иложи борича парҳез усулида тайёрланган таомларга эътибор қаратиш керак. Димлаб, қайнатиб пиширилган егуликлар билан тановул қилинг, шунингдек, сабзавот ва меваларни ҳам канда қилманг.
Сув балансига риоя қилинг
Сув метаболизмни жадаллаштириб, токсинларни организмдан чиқариб юборишга ёрдам беради. Етарли миқдорда сув ичиш тери аҳволи яхшиланиши, шунингдек, вазн камайишига ҳам ҳисса қўшади.
Турмуш тарзи ва овқатланишни ўзгартирмоқчи бўлганларга организмнинг кислотали реакциясига сабаб бўладиган маҳсулотлардан тийилиш тавсия қилинади. Ҳар қандай маҳсулотнинг парчаланиши давомида организмда кислота ёки ишқорли реакция юз беради. Ишқордан фарқли равишда кислота организмни секин тарк этади ва тўпланиш хусусиятига эга бўлади. Ишқор ва кислота ўртасидаги баланс бузилса, турли касалликлар ривожланади, киши ўзини ёмон ҳис қилади ва қариш жараёни тезлашади.
Изоҳ (0)