Ўта жиддий касалликлардан бир ҳисобланган сил касаллиги стресс, яхши овқатланмаслик ва иммунитет пастлиги сабаб жадаллашиб кетиши, бунинг оқибати эса яхшилик билан тугамаслиги мумкин. Асосан ҳаво томчи йўли билан тарқаладиган ушбу касаллик ривожланиб кетишининг олдини олиш учун бир йилда бир марта текширувдан ўтиш ҳамда унга хос дастлабки симптомлар ҳақида маълумотга эга бўлиш керак.
Йўтал
Йўтал сизда 3 ҳафта ёки ундан кўп вақт давомида кузатилаётган бўлса, демак сизда хавотирланишга асос бор. Мутахассисга учраб, ўпка ва нафас йўлларини текширтириш учун йўталнинг кучли бўлиши шарт эмас. Аслида, узоқ вақт давом этаётган йўталга аллергия, бронхит ва ҳатто ҳаво намлигининг етарли бўлмагани ҳам сабаб бўлиши мумкин. Нима бўлган тақдирда ҳам, бефарқ бўлмасдан, вақтида бориб текширтиринг.
Кўкрак қафасида дискомфорт
Оғриқ ушбу касалликнинг кейинги босқичларида кузатилади. Дастлаб эса йўтал, кўкрак қафасида дискомфортни ҳис қилиш билан бирга намоён бўлиши мумкин. Чуқур нафас олганда бўғилиш ва нафас қисиши ҳам инкор қилиб бўлмайдиган симптомлардан. Агар ушбу ҳолат ўтиб кетмайдиган бўлса, зудлик билан шифокорга мурожаат қилиш керак.
Кескин вазн йўқотиш
Озиш учун ҳеч қандай ҳаракат қилмаган тақдирингизда ҳам, тўсатдан вазнингиз камайганини пайқасангиз, мутахассисга бориш учун сизда яна бир муҳим сабаб бор. Гап шундаки, организмдаги бу каби ўзгариш кўп ҳолларда жиддий касалликлар, хусусан, силдан ҳам дарак бериши мумкин.
Тана ҳароратининг бироз ортиши
Тана ҳароратининг мунтазам равишда 37,2-37,5 даража бўлиши, шунингдек, ушбу симптомнинг йўтал билан бирга кузатилиши силга хос аломат саналади.
Иштаҳа камайиши ёки йўқолиши
Касаллик кузатилганда организм унга қарши курашиш учун бор кучи билан ишлайди ва бошқа тизимлар, хусусан, ҳазм қилиш тизимидан ҳам «қарз олади». Шунинг ҳисобига иштаҳа бўғилиши мумкин. Агар бу ҳолат сизга бегона бўлмаса ва камига юқоридаги симптомлар билан бирга кузатилаётган бўлса, шифокорга боришни ортга сурманг.
Қаттиқ чарчаш
Ҳеч нима қилмаса ҳам, ҳолсиз бўлиш ва бир зумда чарчаб қолиш бежизга бўлмаслиги мумкин. Лоҳаслик ва ҳолдан тойишнинг ортиши организм қандайдир яширин душман билан курашаётганидан далолат бериши мумкин.
Терлаш
Климаксга ҳали эрта бўлишига қарамай, бирданига исиб кетиш ёки аксинча тўсатдан қизиб кетиш ҳолати ҳам кўздан қочирмаслик керак бўлган симптомлардан. Айниқса, кечаси терлаш кузатиладиган бўлса, сил ривожланаётгани хавфи юқори бўлиши мумкин.
Изоҳ (0)