Андижон вилояти Избоскан туманидаги қишлоқ оилавий поликлиника (ҚОП)ларидан бирининг шифокори 200 доллар миқдорида пора олганликда гумон қилинмоқда. Бу ҳақда, ДХХ ва Бош прокуратура ҳузуридаги департаментнинг ҳудудий бўлинмаларига асосланиб, «Дарё» мухбири Умиджон Мамарасулов хабар бермоқда.
«Избоскан туманидаги 30-сонли ‘Дўстлик’ қишлоқ оилавий поликлиникаси умумий амалиёт шифокори фуқаронинг ишончига кириб, уни тиббиёт бирлашмасидаги юқори лавозимли танишлари орқали ўзи ишлаётган поликлиникага 0,75 ставкага ишга жойлаштиришини айтиб, бунинг эвазига эса 200 доллар талаб қилган», — дейилади тегишли идоралар тақдим этган ахборотда.
Қишлоқ оилавий поликлиникаси шифокори Избоскан тумани А. Жомий номли маҳалла биноси олдида фуқародан 200 долларни олаётган вақтида ДХХ ва департамент тезкор ходимлари томонидан ашёвий далиллар билан ушлангани айтилмоқда.
Қўшимча қилишларича, ҳолат юзасидан Жиноят кодексининг 168-моддаси 1-қисми (фирибгарлик), 211-моддаси (пора бериш) билан жиноят иши қўзғатилган, тергов давом этмоқда.
Мавзуга доир:
- Янгийўлда бино ҳужжатларини тайёрлаб беришини ваъда қилиб, тадбиркордан пора олаётган Кадастр агентлиги ходими ушланди
- Сирдарёда Давлат солиқ бошқармаси бўлим бошлиғи 1000 доллар пора билан қўлга тушди
- Жиззахда дарахтларнинг кесилганини яшириш учун пора талаб қилган атроф-муҳитни муҳофаза қилиш ходими ушланди
- Қўқон давлат педагогика институтига ўқишга киритиб қўйишни ваъда қилиб, 3 минг доллар олган деканга суд ҳукми ўқилди
Изоҳ (0)