Қирғизистон президенти Садир Жапаров Шавкат Мирзиёев ҳамроҳлигида Тошкент шаҳридаги технопаркка ташриф буюрди, деб хабар бермоқда Президент матбуот хизмати.
Ушбу мажмуа давлат раҳбарининг 2019 йил 1 майдаги «Саноат кооперациясини янада ривожлантириш ва талаб юқори бўлган маҳсулотлар ишлаб чиқаришни кенгайтириш чора-тадбирлари тўғрисида»ги қарори асосида ташкил этилган. Бу ерда умумий қиймати 365 миллион долларлик 17 та лойиҳа амалга оширилмоқда.
Хабарда айтилишича, Қирғизистон президентига технопаркдаги корхоналарда ишлаб чиқарилаётган маҳсулотлар: маиший техникалар, электрон газ ҳисоблагичлар, лифтлар, сув насослари, саноат кондиционерлари ва совитиш тармоқлари ҳақида маълумот берилди.
Давлат раҳбарлари Ўзбекистоннинг саноат, қишлоқ хўжалиги ва ҳунармандчилик маҳсулотлари кўргазмаси билан танишди. Кўргазмага 24 та тармоқ ва 14 ҳудудда ишлаб чиқарилаётган мингдан ортиқ маҳсулотлар қўйилган.
Президент Шавкат Мирзиёев Қирғизистонда ҳам керакли салоҳият борлиги, уни юзага чиқариш учун Ўзбекистон кооперациялар ташкил этиш ва тажриба алмашишга тайёр эканини таъкидлади. Тармоқ раҳбарларига Қирғизистондаги турдош муассасалар билан яқиндан ишлаб, қўшма лойиҳаларни амалга ошириш бўйича кўрсатмалар берди.
Эслатиб ўтамиз, Қирғизистон президенти Садир Жапаров Президент Шавкат Мирзиёевнинг таклифига биноан давлат ташрифи билан Ўзбекистонга 11 март куни келди. Уни бош вазир Абдулла Арипов кутиб олди. Шу куни Жапаров бош вазир Абдулла Арипов ҳамроҳлигида Тошкентдаги Мустақиллик майдонига ташриф буюрди ва Мустақиллик ва эзгулик монументи пойига гулчамбар қўйди. Шундан сўнг Кўксарой қароргоҳига йўл олди.
Кўксаройда Қирғизистон президенти Садир Жапаровни расмий кутиб олиш маросими бўлди. Дастлаб давлат раҳбарларининг тор доирадаги музокаралари ўтди. Учрашув чоғида Ўзбекистон билан Қирғизистон ўртасидаги стратегик шериклик муносабатларини мустаҳкамлаш, кўп қиррали ҳамкорликни кенгайтириш масалалари муҳокама қилинди. Сўнг Шавкат Мирзиёев ва Садир Жапаров музокараларни икки мамлакат расмий делегациялари иштирокида давом эттирди.
Музокаралар якунлангач, Ўзбекистон ва Қирғизистон ўртасида жами 22 та ҳужжат имзоланди. Президент Шавкат Мирзиёев оммавий ахборот воситалари вакиллари билан учрашувда музокаралар ишонч муҳитида ўтгани, томонлар ўзаро ҳурмат ва манфаатларни ҳисобга олиш тамойиллари асосида кенг миқёсли вазифаларни ҳал қилишга тайёр эканини қайд этди.
Тадбирлар якунига етгач, Ўзбекистон Президенти Шавкат Мирзиёев номидан Қирғизистон президенти Садир Жапаров ташрифи шарафига расмий қабул маросими ташкил этилди. Маросимда икки мамлакат расмий делегацияси аъзолари, давлат ва жамоат арбоблари, Ўзбекистондаги қирғиз диаспораси вакиллари иштирок этди.
Изоҳ (0)