Хитой монополияга қарши кураш органлари ҳукумат билан зиддиятга борган 56 ёшли миллиардер Жек Мага тегишли Alibaba интернет савдо тармоғига рекорд даражада жарима солишни режалаштирмоқда. Бу ҳақда The Wall Street Journal’га таяниб, Meduza хабар берди.
Жарима миқдори очиқланмаган, аммо нашр маълумотларига кўра, товон процессор ишлаб чиқарувчи Qualcomm компаниясига тайинланган жаримадан юқори бўлиши мумкин. 2015 йилда Qualcomm 975 миллион доллар миқдорида жаримага тортилган эди, бу Хитой тарихидаги энг йирик корпоратив жарима бўлган.
Нашрнинг таъкидлашича, Хитой маъмурлари, маҳаллий аҳоли ва глобал сармоядорлар орасида оммалашган Alibaba’ни йўқ қилиш ниятида эмас, аммо бунинг учун корпорация ўз асосчиси билан алоқаларни узиши ва Хитой Коммунистик партияси билан яқин ҳамкорликда ишлай бошлаши керак.
Монополияга қарши органлар, шунингдек, Alibaba’дан онлайн сотувчиларини бошқа сайтларда савдо қилишини тақиқловчи амалиётидан воз кечишни талаб қилиши мумкин, дейилади нашрда. Шунингдек, ваколатли органлар корпорациядан асосий фаолиятига алоқадор бўлмаган активларининг бир қисмидан воз кечишни ҳам талаб қилиши мумкин.
Мавзуга доир: Хитой ҳукумати Жек Мага қарши уруш эълон қилди
Шанхайдаги чиқишидан сўнг, Жек Ма муайян вақт омма олдида кўриниш бермаган. У Хитойни тарк этган ёки ҳибсга олинган, деган тахминлар пайдо бўлган, аммо унинг дўстлари тадбиркор мамлакатда эканини даъво қилган. 2021 йил январь ойида Жек Ма уч ой ичида биринчи марта жамоатчилик олдида пайдо бўлди.
2020 йилнинг ноябридан бошлаб Alibaba акцияларининг пасайиши фонида Жек Манинг бойлиги 12 миллиард доллардан кўпроққа — 61,7 миллиарддан 49,1 миллиардгача камайди. Натижада Жек Ма Хитойнинг энг бой одами мақомидан айрилди ва мамлакат миқёсидаги энг бой миллиардерлар учлигидан ҳам тушиб қолди.
Изоҳ (0)