Тошкентдаги «Дикарём» ресторани асосчиси ва эгаси Артур Рудомёткин электр энергиясининг ўчириб қўйилиши ва бино фасадида соябонларнинг олиб ташланиши бўйича Миробод туман ҳокимлиги устидан шикоят қилди, деб хабар беради «Gazeta.uz».
Унинг сўзларига кўра, бир неча кун олдин Нукус кўчасидаги «Дикарём» ресторанига Миробод туман ҳокимлиги вакиллари келиб, «фасадни зудлик билан бўяш талабини қўйган». Тадбиркор фасад «минерал крошка» билан бўялгани учун уни бўяш мумкин эмаслигини айтган.
«Эртаси куни Миробод тумани ҳокими Шухрат Пўлатовнинг ўзи келиб фасаддаги ‘минерал крошка’ни бўяш бемаънилик эканлигига қўшилган ва тез орада муҳим делегация бу ердан ўтиши сабаб фасад ҳамда барча соябонларни ювиш бўйича топшириқ берган. Биз рози бўлдик ва 9 март куни фасадни ювиш учун 4 миллион сўм ўтказдик, бу биз учун кутилмаган харажат», — деб ёзади у ўзининг Facebook’даги саҳифасига.
Рестораторнинг таъкидлашича, 10 март куни эрталаб Миробод туман ҳокими келиб, барча соябонларни кесиш бўйича топшириқ берган.
«Ярим соатдан кейин ресторанимизда чироқ ўчди. Биз муҳим ишларимизни ташлаб ‘Ҳудудий электр тармоқлари’ ва бошқа инстанцияларга бориб, гап нимада эканлигини аниқлашга киришдик. Кейинроқ Миробод туман ҳокимлиги ходими биз билан боғланиб, электр энергияси юқоридаги талаблар бартараф этилмагунича ва соябонлар, барча пешлавҳалар олинган суратни юбормагунимизча ёнмаслигини айтди (яхшиям бинога газ қўйиб юборишмади). 4 йилдан буён турган пешлавҳа кимга халақит берди экан, деган савол туғилади», — дейди у.
Артур Рудомёткиннинг айтишича, электр энергиясининг ўчирилиши «катта миқдордаги қиммат турувчи маҳсулотлар ва ярим тайёр маҳсулотлар»нинг бузилишига, шунингдек, муассаса меҳмонларни қабул қила олмагани учун даромадсиз қолишига олиб келиши мумкин. Кейинроқ у маҳсулотларнинг бир қисми утилизация қилинганини айтган.
«Қачонгача Президентимизнинг барча давлат хизматлари ходимларини тадбиркорларга ёрдам беришга чақираётганини тинглаймиз, Президентнинг барча тавсия ва талаблари шунчаки бажарилмаслик ўрнига, аксинча, қарши чиқмоқда. Фармойиш қаерда? Суд қарори қаерда? Нега бир кун ичида турли амалдорлар келиб, ўз хоҳишига кўра талаб қилишлари мумкин? Бутун бизнесни ғарқ қилмоқчимисиз, давом этинг!», — дея таъкидлайди у.
Тадбиркор агарда ҳокимлик туманни «ободонлаштиришга ёпишган» бўлса, «реставрация қилиниши керак бўлган барча фасад ва йўлларнинг суратларини тақдим этишга» тайёрлигини билдирган.
«Gazeta.uz» билан сурҳбатда ресторатор муассасадаги электр энергияси таъминоти тахминан соат 10:00 да ўчирилгани ва соат 18:40 да ёқилганини айтган.
Миробод туман ҳокимлиги матбуот хизматининг маълум қилишича, электр энергиясининг ўчирилишига боғлиқ ҳолат «Ҳудудий электр тармоқлари» мутахассислари томонидан ўрганилмоқда. Бинони бўяш ва пешлавҳаларнинг олиб ташланиши борасидаги талаб эса «ҳозирда ўрганилмоқда» деб, таъкидланган матбуот хизмати хабарида.
Эслатиб ўтамиз, 2020 йилнинг 0хирида Тошкент марказидаги кафе ва ресторанларнинг ноқонуний қўшимча қурилмалари олиб ташланаётгани тўғрисида хабар берилганди.
Изоҳ (0)