Халқаро олимпия қўмитаси (ХОҚ) Беларусь президенти Александр Лукашенконинг катта ўғли — Виктор Лукашенконинг мамлакат Миллий олимпия қўмитаси (МОҚ) раҳбари этиб сайланганини тан олмади, деб ёзади Meduza ХОҚнинг сайтига жойлаштирилган баёнотга таяниб.
Шунингдек, ХОҚ Беларусь Хоккей федерацияси раҳбари ва Александр Лукашенкога яқин шахслардан бири Дмитрий Басковнинг МОҚ ижроия қўмитасига сайланганини ҳам тан олмади, у Беларусь ОАВлари томонидан минсклик Роман Бондаренконинг ўлимига алоқадорликда гумон қилинмоқда.
ХОҚ Беларусь МОҚ раҳбариятининг Олимпия ўйинларида иштирок этишга қўйилган тақиқни узайтиришини ва ташкилот билан алоқани фақат унинг бош котиби Полина Головина орқали ушлаб туришини маълум қилди.
Виктор Лукашенко 26 февраль куни Беларусь МОҚ раҳбари этиб сайланди. Бунгача ташкилотга 24 йил мобайнида Александр Лукашенко президентлик қилган. Виктор Лукашенко 2019 йилдан буён МОҚнинг вице-президенти бўлиб келган.
2020 йил декабрида ХОҚ Александр ва Виктор Лукашенколарга ўз тадбирларига, шу жумладан, Олимпия ўйинларига ташриф буюришни тақиқлаб қўйди. Бундай қарор беларуслик спортчиларнинг сиёсий сабабларга кўра таъқиб қилиниши туфайли қабул қилинганди.
Дмитрий Басков — Беларусь Хоккей федерацияси раҳбари, Александр Лукашенконинг кенжа ўғли Николайнинг хоккей бўйича шахсий мураббийи. Ноябрь охирида Беларуснинг мухолифатчи Telegram-канали Nexta Live эълон қилган ёзувлар Басков намойишчиларга қарши ҳужумларда қатнашгани ҳақида гувоҳлик берган. Энг аввало, у Минск фуқароси, рассом Роман Бондаренкони дўппослаганликда гумон қилинди, у билан Минскнинг «Ўзгаришлар майдони»даги тўсиқдан оқ-қизил-оқ тасмаларни ечиб олган одамлар муштлашув уюштирган эди. Дўппослашлардан кейин Бондаренко вафот этган.
Аввалроқ Александр Лукашенконинг тўнғич ўғли Виктор Лукашенко 2021 йил 26 февралда отасининг ўрнига Беларусь Миллий Олимпия қўмитаси (МОҚ) президенти этиб сайлангач, Беларусь президентининг миллий хавфсизлик бўйича ёрдамчиси лавозимидан озод этилгани хабар берилган эди. 45 ёшли Виктор Лукашенко 2005 йилдан бери Беларусь президентининг ёрдамчиси лавозимини эгаллаб келган. 2021 йил 26 февралда у отасининг ўрнига Беларусь Миллий Олимпия қўмитаси (МОҚ) президенти этиб сайланди. Бунга қадар 1997 йил май ойидан буён Александр Лукашенко МОҚ президенти сифатида фаолият юритиб келаётган эди.
Ундан аввал эса Лукашенко ҳокимиятни ўғилларига топшириши ҳақидаги миш-мишларни рад этган эди. «Кўп эшицангиз керак: ҳокимият транзити, Лукашенко ҳокимиятни ҳеч бўлмаганда тўнғич ўғлига топширади, у мамлакатда ҳукмронлик қилади, деган гаплар юради. Менинг оиламда бу ҳеч қачон муҳокама қилинмаган ва муҳокама қилиниши мумкин эмаслигини ҳам кўп айтганман. Чунки мендан кейин бирорта фарзандим Беларусь президенти бўлмайди», — деган давлат раҳбари Миллий Олимпия қўмитаси (МОҚ) йиғилишида.
Изоҳ (0)