Ўзбекистон фуқароларини хорижда иш билан таъминлаш мақсадида Ташқи меҳнат миграцияси агентлиги ва Қозоғистон иш берувчилари ўртасида олиб борилган музокаралар натижасида фуқароларни ушбу давлатга ишга жалб қилиш бўйича келишувга эришилди, деб хабар бермоқда агентлик матбуот хизмати.
Хабарда айтилишича, келишувга мувофиқ 7 март куни Қорақалпоғистондан 490 нафар фуқаро «Довуд ота» чегара пости орқали йирик қурилиш объектларида белгиланган эпидемиологик талабларга риоя қилган ҳолда ишлаш учун Қозоғистоннинг Ақтау шаҳрига ташкиллаштирилган ҳолда жўнаб кетди.
Ташқи меҳнат миграцияси агентлиги Қорақалпоғистон филиали ходимлари томонидан тегишли тушунтиришлар берилиб, бепул суғурта полиси ва хизмат кўрсатиш шартномаси расмийлаштирилган. Меҳнат мигрантлари ҳуқуқ ва манфаатларини ҳимоя қилиш юзасидан тарқатма материаллар берилган.
Аввалроқ Шавкат Мирзиёевнинг 25 февралдаги қарори билан Ўзбекистон ва Қозоғистон ҳукуматлари ўртасида меҳнат фаолияти ва Қозоғистонда Ўзбекистон фуқароси бўлган меҳнат муҳожирлари ва Ўзбекистонда Қозоғистон фуқароси бўлган меҳнат муҳожирлари ҳуқуқларини ҳимоя қилиш тўғрисидаги битим тасдиқлангани ҳақида хабар берилган эди.
Битимга асосан, меҳнат мигрантлари қабул қилувчи мамлакат қонунчилиги ва меҳнат шартномаси шартларига мувофиқ дам олиш, атрофдагилар учун хавф туғдирадиган ўткир касалликлар бўйича кафолатланган бепул тиббий ёрдам олиш, қабул қиладиган мамлакатнинг ваколатли органлари томонидан ҳудудда бўлиш шартлари ва тартиблари, меҳнат фаолиятини амалга ошириш тўғрисида маълумот олиш ва бошқа ҳуқуқларга эга.
Ҳужжатда меҳнат мигрантларининг иш ҳақини тўлаш ва уларнинг даромадларидан солиқ тўлаш, пенсия ва ижтимоий таъминот, ўлим ёки шикастланиш ҳолатларида тўловлар ва компенсациялар, шунингдек меҳнат мажбуриятларини бажариш билан боғлиқ жароҳат, касб касаллиги ёки бошқа соғлиққа етказилган зарарни қоплаш масалалари ҳам тартибга солинган.
Изоҳ (0)