Бухорода тадбиркорга қурол ўқталиб, ундан 70 минг доллар талаб қилган спортчилар қўлга олинди

Бухорода тадбиркорга ўқотар қурол ўқталиб, ундан 70 минг доллар талаб қилган спортчилардан иборат жиноий гуруҳ қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.

Таъкидланишича, спортчилардан иборат бир неча киши вилоятда ўзига тўқ тадбиркор сифатида танилган 46 ёшли Т.С.нинг катта даромадга эга эканини ва моддий жиҳатдан яхши таъминланганидан хабардор бўлгач, товламачилик йўли билан ундан пул ундириш пайига тушган.

Аниқланишича, 1962 йилда туғилган фуқаро Б.С. 1960 йилда туғилган акаси Б.И., 1992 йилда туғилган И.С. ҳамда 1983 йилда туғилган Ш.Д. исмли спортчи йигитлар билан жиноий тил бириктириб, тадбиркордан пул ундириш режасини тузган ва вазифаларни ўзаро тақсимлаб олган.

Воқеалар ривожига кўра, Т.С.нинг ишхонасига қўшни қурилиш фирмасида қоровул бўлиб ишлаб келаётган Б.И. шерикларига кунлик маълумотларни етказиб турган. Гуруҳ тадбиркорнинг қайси вақтда ишга келиши ва ишдан кетиши, қайси русумдаги автомашиналарда юриши, ёнида кимлар бўлиши ва бошқа шу каби маълумотларга эга бўлгач, уни қўрқитиш мақсадида «ТОЗ» русумли қирқма ўқотар қурол ҳам тайёрлаб қўйган.

2021 йилнинг 4 март куни соат 17:10 да гумонланувчи Б.С. акаси И.С. билан Ш.Д.нинг машинасида тадбиркор бошқарувида бўлган Captiva’ни йўлда тўхтатиб, машина салонига ўтирган. Ва олдиндан тайёрлаб қўйилган ўқотар қуролни тадбиркорга ўқталиб, уни ўлдириш учун буюртма тушганини, агар уни бажарса, 50 минг доллар хизмат ҳақи олишини, агарда буюртмачи томонидан бериладиган суммадан ортиқроқ пул берса, уни ўлдирмасдан, буюртма берган шахслар тўғрисида маълумот беришини айтиб, 70 минг доллар талаб қилган.

Тадбиркор бу шахсларнинг талабига рози бўлиб, икки кун муҳлат сўраган ва шу тариқа уларнинг қўлидан қутулган.

2021 йилнинг 5 март куни вилоят ИИБ бошлиғига мурожаат қилган тадбиркор ўз аризасида унга нисбатан товламачилик қилаётган шахслар ҳақида маълум қилган ва кўмак сўраган.

Тадбиркор аризасига кўра, вилоят ИИБ Жиноят қидирув бошқармаси томонидан тергов-тезкор гуруҳи тузилиб, кечиктириб бўлмас терговга қадар текширув ҳаракатлари олиб борилган.

2021 йилнинг 6 март кунидан 7 март кунига ўтар кечаси ўтказилган тезкор тадбирда жиноий гуруҳ аъзоси И.С. кимёвий ишлов берилган қиймати 522 миллион сўм бўлган 50 минг долларни жабрланувчидан олаётган вақтда ашёвий далиллар билан қўлга олинган.

Жиноий гуруҳ ташкилотчиси Б.С. дан эса бир дона «ТОЗ» русумли қирқма ўқотар қурол, 6 дона жанговар патронлар, жиноий гуруҳнинг яна бир аъзоси И.С.дан бир дона совуқ қурол ҳисобланган пичоқ ашёвий далил сифатида ҳужжатлаштириб олинган.

Ҳозирда мазкур ҳолат юзасидан вилоят ИИБ Тергов бошқармаси томонидан жиноий гуруҳ аъзоларига нисбатан Жиноят кодексининг 165-моддаси 3-қисми билан (товламачилик) жиноят иши қўзғатилган. Айни пайтда гумонланувчиларга нисбатан қамоққа олиш тарзидаги эҳтиёт чораси қўлланилган ва дастлабки тергов ҳаракатлари давом эттирилмоқда.