Гардеробда ўз ўрнига эга бўлган пиджак тўғри танланса, аёллар образининг эсда қоларли бўлишига, аксинча бўлса, бачкана кўринишига сабаб бўлади.
Ҳаддан ташқари тор
Кўпчилик аёл-қизлар қоматга урғу бериш мақсадида тор пиджак моделларига эътибор қаратади. Аммо бундай устки кийим ҳаракатланиш учун ноқулай, шунингдек, торлигидан матода турли из ва бурмалар пайдо бўлади. Бугунги кунда дизайнерлар томонидан илгари сурилаётган кенг бичимли пиджаклар эса сизни фақатгина замонавий кўрсатиб қолмай, бемалол ҳаракатланишингизни таъминлайди.
Бел қисми резинкали моделлар
Резинкали пиджак хипча бел кўрсатиши рост, аммо бундай модель аллақачон модадан қолди. Шу сабаб ҳам уни камарли пиджакка алмаштириш тавсия қилинади. Турли ўлчам, ранг ва қалинликдаги камар ёки белбоғдан фойдаланиш орқали образингиз янада қизиқарли кўринади. Унга мос пойабзал кийиш ёки рўмол тақиш тавсия қилинади.
Детальлари кўп бўлган бачкана модель
Пиджак сипо ва безаклардан холи бўлгани яхши. Кўп деталлар мужассам бўлган пиджак сизни дидли кўрсатмаслиги аниқ. Бу нафақат тилларанг тугмалар, балки чўнтакларга ҳам тааллуқли. Пиджак бу сумка эмас, унинг чўнтакларга бой бўлиши сизнинг кийиниш борасида эскича қарашга эга эканлигингиздан далолат беради. Бундай моделни оддий вариантдаги устки кийимга алмаштиринг. Образингиз янада ёрқин бўлишини истасангиз, рангларга эътибор қаратинг. Мавсумга ва тери рангига мос ранг-баранг пиджак билан жинси ёки ўзига хос либос кийишингиз мумкин.
Ёқаси бошқа рангда бўлган пиджак моделлари
Бошқалардан ажралиб туриш мақсадида аксарият қизлар ёқаси, енги ёки чўнтаги бошқа рангда бўлган устки кийимларга эътибор қаратади. Аммо бундай моделларни ҳамма кийим билан ҳам мослаб бўлмайди. Агар ноодатий нимадир истайдиган бўлсангиз, классик принтли, масалан, катак-катакли жакетларга эътибор қаратинг. Рангли чизиқли кул ранг моделлар офис учун айни муддао. Кундалик учун эса ундан ҳам қизиқ вариантларни топса бўлади.
Нотўғри матодан тикилган пиджак
Жакет танлашда унинг қандай матодан тикилганига алоҳида эътибор қаратиш керак. Қоматда чиройли туриши ва кун давомида ғижим бўлиб қолмаслиги учун мато қаттиқ ҳамда сифатли бўлиши керак. Юпқа, тез ғижим бўладиган моделлар образни арзон кўрсатибгина қолмай, ноқулайлик келтириб чиқаради. Бюджет чекланган бўлса, велвет ва бахмалдан тикилган устки кийимларни харид қилиш тавсия қилинади. Ёзда эса лёндан тикилган жакетлар айни муддао. Жазирамада ҳаво ўтказадиган мазкур матодан тикилган устки кийимни кузда бемалол трикотаж ва пахта матоли либослар билан мосласа бўлади.
Ностандарт бичимли
Классик чизиқли вариант образни тўлиқ ва чиройли, ассиметрик бичимли моделлар эса аксинча, арзон ҳамда бачкана кўрсатади. Қолаверса, бундай жакетлар кўпроқ накидкани эсга солади.
Изоҳ (0)