Чуст туманининг «Ёрқишлоқ» маҳалласида яшовчи Рухшона Ўктамова 23-умумтаълим мактабининг 7-синфида якка тартибда таҳсил олади. Чақалоқлигида икки оёғидан айрилган қаҳрамонимиз Параосиё ўйинлари ғолиби ва моҳир дўппидўз бўлиш ниятида. Бу ҳақда «Дарё» мухбири Азизбек Абдувалиев ҳикоя қилмоқда.
Рухшонанинг турмушга чиққан икки опаси ва мактабнинг иккинчи синфида ўқийдиган укаси бор. Дадаси ҳунарманд, ойиси эса уй бекаси. Муқаддас Мадумарова бундан 14 йил аввал бўлган ҳодиса учун ҳозиргача ўзини айбдор санайди.
—Ўшанда қаҳратон қиш эди, сандалга ўтин-кўмир қалаб, шу билан жон сақлаётгандик. Рухшона 8 ойлик чақалоқ. Мол-қўйга қарайин деб ташқарига чиққан пайтим эмаклаб сандалга тушиб кетган. 3 ой касалхонада қараб ётдим. Шифокорлар икки оёғини кесиб ташлашга мажбур бўлди. «Юзи, қўли куймабди, шунга шукр қилинг» дейишди юпатиб. Олдинлари бунинг учун ўзимни кечиролмай, сиқилиб юрардим. Қизим катта бўлганидан кейин бунга йўл қўймай, койиб берадиган одат чиқарди. «Мени нега ўйлайсиз, қўлларим бутун, кўзим кўрса, қулоғим эшитса, қолгани пешонамдан» дейишни қўймайди, — дейди Муқаддас Мадумарова.
Қаҳрамонимиз бундан уч йил аввал пара пауэрлифтинг билан қизиқиб қолди. Таянч-ҳаракат аппаратида нуқсони бўлган кишилар учун мўлжалланган спортнинг паралимпик турида атлет танасининг юқори қисми кучини намойиш этади.
—Рухшона ўқийдиган мактабда оғир атлетика тўгарагини очганмиз. Ўзим таклиф қилдим, бу ерга келиб, шуғулланиб юрди. Ёғин-сочин кунларда қийналмасин деб уйига ҳам штанга ўрнатиб бердик, гантеллари бор. Натижалари чакки эмас. 2019 йили Тошкентда ўтказилган пара пауэрлифтинг бўйича Ўзбекистон биринчилигида учинчи ўринни эгаллади. Бу йил Ўзбекистон терма жамоаси таркибига киритилди. Энди Хитойнинг Ханчжоу шаҳрида 2022 йилда бўлиб ўтадиган Параосиё ўйинларига тайёргарлик кўряпмиз, — дейди Чуст туманидаги болалар ва ўсмирлар спорт мактаби мураббийи Ойбек Иномжонов.
Рухшона бўш вақтларида китоб мутолааси ва дўппи тикиш билан шуғулланади. Ҳафтасига икки-уч дўппи қўлидан чиқади. Хонадонидагилар учун овқат ҳозирлайди, айниқса манти тайёрлашни хуш кўради. Кунда-кунора келиб турадиган дугоналари билан сирлашишни ҳам канда қилмайди.
Келгусида эса устози каби спорт мураббийи бўлмоқчи. Бундан олдин ўзи шуғулланаётган пара пауэрлифтинг юқори натижаларни қўлга киритиш, Параосиё ва Паралимпия ўйинлари ғолиби бўлишни дилига туккан. Ота-онаси чустлик яна бир машҳур спортчи — боксчи Муроджон Аҳмадалиевнинг яқинлари каби у билан фахрланиб юришларини орзу қилади.
Аслида эса ота-онаси, маҳалла аҳли ва ўзи таҳсил олаётган мактаб жамоаси ҳозир ҳам у билан фахрланишларини бот-бот такрорлашади.
Изоҳ (0)