Монополияга қарши курашиш қўмитасининг Сурхондарё вилояти ҳудудий бошқармасининг бўлим бошлиғи ушланди, деб хабар беради Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, Бош прокуратура ҳузуридаги департаментнинг Денов туман бўлими томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Монополияга қарши курашиш қўмитаси Сурхондарё вилояти ҳудудий бошқармаси «Истеъмолчилар ҳуқуқларини ҳимоя қилиш» бўлим бошлиғи ўзининг иш юритувида бўлган «О.» хусусий корхонасига қарашли дорихонада дори воситаларининг қиммат нархларда сотилаётганлигидан норози бўлиб ёзилган мурожаатни ушбу корхонанинг фойдасига ижобий ҳал қилиб бермоқчи бўлган. Бу каби «хизмати» учун у корхона раҳбаридан 200 АҚШ доллари пора талаб қилиб олган вақтида ашёвий далиллар билан қўлга олинган.
Мазкур ҳолат юзасидан Д.А.га нисбатан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистон Монополияга қарши курашиш қўмитасининг қарорлари юзасидан фақатгина Олий судга шикоят қилиш мумкин бўлгани тўғрисида хабар берилганди.
Изоҳ (0)