Навоийда поччаси билан ичкиликбозлик қилган ука опасини пичоқлаб ўлдириб қўйди

Навоий вилояти Кармана туманида поччаси билан жанжаллашиб қолган ука уларни ажратишга уринган опасини пичоқлаб қўйди, деб хабар беради Олий суд матбуот хизмати.

Маълумотларга кўра, Кармана туманида яшовчи Уйғун (исм-шарифлар ўзгартирилган) байрамни уйида қариндошлари билан бирга нишонлашга қарор қилган ва икки опасига қўнғироқ қилиб, аввал байрам билан табриклаган сўнг, уларни поччалар билан бирга уйига меҳмондорчиликка чақирган.

Шу куни тушда Уйғун тўнғич поччаси билан ичкиликбозликни бошлаб юборган. Кечки пайт уларнинг даврасига кичик поччаси Давлат Отажонов ҳам келиб қўшилган. Бироздан сўнг катта почча уйига кетган.

Уйғун билан Давлат эса, ичкиликбозликни давом эттирган. Бироқ улар ўзаро гап талашиб қолган ва Уйғун поччасини ҳақоратлаган. Давлат ҳам бунга жавобан ҳар хил ноўрин сўз­лар айтган. Жаҳл отига мин­ган Уйғун Давлатнинг кийи­мини йиртиб ташлаган. Шунда унинг опаси ўртага тушиб, эрини ташқарига чиқариб юборган. Бундан ғазабланган Уйғун опасининг чап томон елка ўмров соҳасига қўлидаги ўткир ошхона пичоғини санчиб олган. Оғир тан жароҳати олган аёл тез тиббий ёрдам автомашинасида зудлик билан шифохонага олиб борилган. Бироқ кўрсатилган муолажаларга қарамай, унинг ҳаётини сақлаб қолишнинг имкони бўлмаган.

Суд мажлисида сўроқ қи­линган судланувчи Уйғун Шокиров айбига иқ­рорлик билдирмаган. Унинг таъкидлашича, «тарвуз сўяётганда пичоқ тў­сатдан опасининг танасига кириб кетган».

Жиноят иши юзасидан гувоҳ сифатида сў­роқ қилинган жабрланувчининг қонуний вакили Давлат Отажонов ва бош­қа гувоҳларнинг кўрсатмалари, шунингдек, Хадича Сулаймонова номидаги суд-тиббий экс­пертиза илмий-амалий маркази Навоий филиали Кар­мана туман бў­линма­сининг 2020 йил 10 сентябрдаги 51-сонли хулосасига асосланиб, судланувчининг кўрсатмаларини жавобгарликдан қутулиб қолиш мақсадида ўйлаб топилган важлар деб топди.

Суд мажлисида қў­шимча гу­воҳ сифатида сўроқ қилинган судланувчи Уйғун Шокиров истиқомат қиладиган маҳалла фуқаролар йиғини раиси С. Тожиқуловнинг кўрсатмаси ҳам олинган.

«Уйғун илгари ҳам спиртли ичимлик истеъмол қилиб, тез-тез жанжал чиқариб турар эди. Опаси билан ўрталарида келишмовчилик бўл­ганини эшитмаганман. Лекин поччаси Давлат Отажонов билан чиқишолмаслигидан хабардор эдим», — дейди у.

Суд судланувчи Уйғун Шокировни Жиноят кодексининг 104-моддаси 3-қисми «д» бандида назарда тутилган жиноятни содир этганликда айбдор деб топган ва унга 8 йил муддатга озодликдан маҳрум қи­лиш жазосини тайинлаган.

Фарғонада келинини пичоқлаб ўлдирган қайнота 10 йилга озодликдан маҳрум қилингани, Самарқандда икки йигитнинг ўзаро жанжали бирининг пичоқлаб ўлдирилиши билан якунлангани, Андижонда эр ишдан кеч келган 21 ёшли аёлини уриб, ўлдириб қўйгани тўғрисида хабар берилганди.