Ўзбекистон Япония халқаро ҳамкорлик агентлиги (JICA)дан жами қиймати 333,4 миллион доллар бўлган иккита кредит жалб қилишни режалаштирмоқда. Бу ҳақда Молия вазирлиги томонидан ишлаб чиқилган Вазирлар Маҳкамаси қарорида қайд этилган, деб ёзмоқда «Gazeta.uz»
Ҳужжат лойиҳасига кўра, JICA қуйидаги қарз маблағларини ажратишга розилик билдирган:
- Ўзбекистонда коронавирус пандемияси оқибатларига қарши чоралар кўриш учун — 15 миллиард япон иенаси миқдоридаги маблағларни 15 йил муддатга, шу жумладан, 4 йиллик имтиёзли давр билан йиллик 0,01 фоизда;
- «Ривожлантириш сиёсатини қўллаб-қувватлаш» лойиҳасини амалга ошириш учун — 195 миллион долларни 25 йил муддатга, шу жумладан, 7 йиллик имтиёзли давр билан LIBOR ставкаси (6 ойлик) бўйича + йиллик 1,1 фоизда.
Агентлик энергетика соҳасида ислоҳотлар матрицасини ишлаб чиққан бўлиб, уни Энергетика вазирлиги ва «Иссиқлик электр станциялари» АЖ амалга ошириши кутилмоқда.
Марказий банкни «пул ўтказмалари жараёнини оптималлаштириш» учун Ўзбекистон молиявий агенти сифатида тайинлаш режалаштирилган.
Ушбу ҳужжат лойиҳаси муҳокамаси 20 мартгача давом этади.
Эслатиб ўтамиз, Ўзбекистоннинг давлат қарзи 2020 йил якунларига кўра, 30,8 фоизга ошиб, 23,3 миллиард долларни ташкил қилди. 2021 йилнинг 1 январь ҳолатига кўра, Ўзбекистон Япония халқаро ҳамкорлик агентлигидан 2 миллиард доллар қарзи бор.
Изоҳ (0)