Chust tumanining “Yorqishloq” mahallasida yashovchi Ruxshona O‘ktamova 23-umumta’lim maktabining 7-sinfida yakka tartibda tahsil oladi. Chaqaloqligida ikki oyog‘idan ayrilgan qahramonimiz Paraosiyo o‘yinlari g‘olibi va mohir do‘ppido‘z bo‘lish niyatida. Bu haqda “Daryo” muxbiri Azizbek Abduvaliyev hikoya qilmoqda.
Ruxshonaning turmushga chiqqan ikki opasi va maktabning ikkinchi sinfida o‘qiydigan ukasi bor. Dadasi hunarmand, oyisi esa uy bekasi. Muqaddas Madumarova bundan 14 yil avval bo‘lgan hodisa uchun hozirgacha o‘zini aybdor sanaydi.
—O‘shanda qahraton qish edi, sandalga o‘tin-ko‘mir qalab, shu bilan jon saqlayotgandik. Ruxshona 8 oylik chaqaloq. Mol-qo‘yga qarayin deb tashqariga chiqqan paytim emaklab sandalga tushib ketgan. 3 oy kasalxonada qarab yotdim. Shifokorlar ikki oyog‘ini kesib tashlashga majbur bo‘ldi. “Yuzi, qo‘li kuymabdi, shunga shukr qiling” deyishdi yupatib. Oldinlari buning uchun o‘zimni kechirolmay, siqilib yurardim. Qizim katta bo‘lganidan keyin bunga yo‘l qo‘ymay, koyib beradigan odat chiqardi. “Meni nega o‘ylaysiz, qo‘llarim butun, ko‘zim ko‘rsa, qulog‘im eshitsa, qolgani peshonamdan” deyishni qo‘ymaydi, — deydi Muqaddas Madumarova.
Qahramonimiz bundan uch yil avval para pauerlifting bilan qiziqib qoldi. Tayanch-harakat apparatida nuqsoni bo‘lgan kishilar uchun mo‘ljallangan sportning paralimpik turida atlet tanasining yuqori qismi kuchini namoyish etadi.
—Ruxshona o‘qiydigan maktabda og‘ir atletika to‘garagini ochganmiz. O‘zim taklif qildim, bu yerga kelib, shug‘ullanib yurdi. Yog‘in-sochin kunlarda qiynalmasin deb uyiga ham shtanga o‘rnatib berdik, gantellari bor. Natijalari chakki emas. 2019-yili Toshkentda o‘tkazilgan para pauerlifting bo‘yicha O‘zbekiston birinchiligida uchinchi o‘rinni egalladi. Bu yil O‘zbekiston terma jamoasi tarkibiga kiritildi. Endi Xitoyning Xanchjou shahrida 2022-yilda bo‘lib o‘tadigan Paraosiyo o‘yinlariga tayyorgarlik ko‘ryapmiz, — deydi Chust tumanidagi bolalar va o‘smirlar sport maktabi murabbiyi Oybek Inomjonov.
Ruxshona bo‘sh vaqtlarida kitob mutolaasi va do‘ppi tikish bilan shug‘ullanadi. Haftasiga ikki-uch do‘ppi qo‘lidan chiqadi. Xonadonidagilar uchun ovqat hozirlaydi, ayniqsa manti tayyorlashni xush ko‘radi. Kunda-kunora kelib turadigan dugonalari bilan sirlashishni ham kanda qilmaydi.
Kelgusida esa ustozi kabi sport murabbiyi bo‘lmoqchi. Bundan oldin o‘zi shug‘ullanayotgan para pauerlifting yuqori natijalarni qo‘lga kiritish, Paraosiyo va Paralimpiya o‘yinlari g‘olibi bo‘lishni diliga tukkan. Ota-onasi chustlik yana bir mashhur sportchi — bokschi Murodjon Ahmadaliyevning yaqinlari kabi u bilan faxrlanib yurishlarini orzu qiladi.
Aslida esa ota-onasi, mahalla ahli va o‘zi tahsil olayotgan maktab jamoasi hozir ham u bilan faxrlanishlarini bot-bot takrorlashadi.
Izoh (0)