Хитойда ўн тўртинчи беш йиллик ижтимоий-иқтисодий ривожланиш режасини (2021-2025) амалга ошириш жараёнида пенсия ёши аста-секин узайтириб борилади, деди Хитой халқ республикаси Давлат кенгаши бош вазири Ли Кесян. Бу ҳақда «Интерфакс» хабар берди.
«Аҳолининг 95 фоизини кексалик нафақаси суғуртаси билан таъминлаш орқали меъёрий нафақа ёши босқичма-босқич ўсиб боради», — деди бош вазир Пекинда бўлиб ўтган Бутунхитой халқ вакиллари йиғилиши сессиясидаги ҳукумат иши тўғрисидаги ҳисоботида.
Шу ўринда, Ли Кесян ҳукумат «туғилишнинг меъёрий даражасига эришиш учун ишлаш», шунингдек, ижтимоий таъминот тизимини такомиллаштириш ниятида эканини эътироф этди.
Хитойнинг аввалги «бир оила — бир фарзанд» сиёсати мамлакат аҳолисининг табиий кексайишига олиб келди. Мутахассисларнинг ҳисоб-китобига кўра, Хитойда 2035 йилгача иккита ишчи битта нафақахўрни боқади, 2050 йилгача аҳолининг 35 фоизини нафақа ёшидагилар ташкил қилади.
Бугунги кунда Хитойда эркаклар 60 ёшда, аёллар эса 55 ёшда нафақага чиқиши мумкин.
Аввалроқ Хитойда туғилиш даражасининг пастлиги мамлакат иқтисодиётига хавф солиши ҳақида хабар берилган эди.
Изоҳ (0)