АҚШ президенти Жо Байден Эронга қарши санкциялар муддатини бир йилга узайтиришга қарор қилди. Бу ҳақда Оқ уй веб-сайтига таяниб, «РБК» хабар берди.
Байден, шунингдек, АҚШда Билл Клинтон президентлиги даврида Теҳронга қарши эълон қилинган «фавқулодда ҳолат»ни 2021 йил 15 мартгача узайтиради, чунки Вашингтоннинг фикрига кўра, Эроннинг ҳаракатлари «АҚШнинг миллий хавфсизлиги, халқаро сиёсати ва иқтисодиётига таҳдид солишда давом этмоқда».
Гап АҚШнинг Эронга терроризмни қўллаб-қувватлашда айблови туфайли киритилган санкциялари ҳақида кетмоқда. 1995 йил март ойида Клинтон Ислом Республикасига деярли тўлиқ савдо эмбаргосини имзолади ва Америка сармояларини республикага киритишни тақиқлади. Вашингтон, шунингдек, бир неча бор Эронга қарши мамлакатнинг ядро дастури билан боғлиқ санкциялар қўллаган.
2020 йилнинг июль ойида Америка расмийлари Эронга қарши янги санкциялар жорий этилишини эълон қилган эди. Теҳрон томонидан ядро, ракета ва ҳарбий дастурлар учун фойдаланилган маҳсулотлар чекловлар остига тушди. Хусусан, мамлакатга алюминий, мис ва баъзи турдаги пўлат қотишмаларини етказиб бериш тақиқланган. Шунингдек, сентябрь ойи охирида Дональд Трамп Эронга қурол етказиб бериш ёки ундан қурол сотиб олишга алоқадор мамлакатлар, компаниялар ва шахсларга нисбатан санкция жорий этишни кўзда тутувчи фармонни имзолаган.
Ноябрь ойида эса Дональд Трамп маъмурияти Эронга қарши санкцияларни кенгайтириб, яна тўртта шахс ва олтита ташкилотга чекловлар киритди. Бунга сабаб улар 2008 йилдан бери санкциялар остида бўлган Эроннинг Iran Communication Industries ҳарбий фирмасига стратегик аҳамиятга эга бўлган товарларни, шу жумладан электрон компонентларни етказиб беришда кўмаклашган.
Шу жумладан, Эрон ҳам Қўшма Штатларга қарши санкциялар жорий этди. 2021 йилнинг январь ойида Трамп, Давлат котиби Майк Помпео, молия раҳбари Стив Мнучин, Пентагоннинг собиқ раҳбари Марк Эспер, Мудофаа вазири вазифасини бажарувчи Кристофер Миллер ва Марказий разведка бошқармаси раҳбари Жина Хаспел Эроннинг санкциялар рўйхатига киритилди. Теҳрон уларни терроризмни қўллаб-қувватлашда, шунингдек генерал Қосим Сулаймоний ва ядро физиги Муҳсен Фахризоданинг ўлдирилишида иштирок этганликда айблади.
Аввалроқ АҚШ Эрон билан дипломатик алоқаларга очиқлиги, аммо Теҳронга қарши жорий этилган бир томонлама санкцияларни юмшатмоқчи эмаслиги ҳақида Оқ уй матбуот котиби Жен Псаки айтиб ўтган эди.
Изоҳ (0)