Шавкат Мирзиёев уй-жойлар қурилиши халқпарвар комиссия томонидан назорат қилинишини айтди

2021 йилнинг 1 май санасигача кредит бериш, субсидия олиш, ипотека учун бериладиган кўп квартирали уй-жойлар ва қурувчилар ҳақидаги маълумотларни қамраб олувчи ипотека веб-портали ишга туширилади. Бу ҳақда 3 март куни Президент Шавкат Мирзиёев раислигида ўтказилган йиғилишда таъкидланди, дея хабар бермоқда «Дарё» мухбири.

«Энг муҳим масала, берилаётган имтиёзлардан ҳалол-пок фойдаланиш бўйича адолатли тизим яратиш, бу борада одамларимизнинг хабардорлигини ошириш зарур. Вилоят, туман ва шаҳар ҳокимлари қурувчилар билан бирга, маҳаллий кенгашларда ҳамда оммавий ахборот воситалари орқали халққа ҳар ойда ҳисобот беради.

Кенгашлар томонидан депутат, жамоат фаоллари иштирокида халқпарвар комиссия ташкил этилади. Улар қурувчига ерни адолатли ажратилиши, имтиёз оладиган эҳтиёжманд оилалар рўйхатининг шаклланиши ва қурилишлар сифати устидан жамоатчилик назоратини ўрнатади.

Вилоят, туман ва шаҳар ҳокимлари бир ҳафта давомида янги тизим асосида, аҳолини уй-жой билан таъминлашда яратилаётган шароит ва имкониятларни одамларга маҳаллабай тушунтиради. Молия вазири 1 июнга қадар субсидия тўланадиган фуқароларни ижтимоий мезонлар асосида танлаш ва субсидия тўлаш жараёнларини автоматлаштиради. Бунда очиқ-ошкораликни таъминлаш ва мурожаатларнинг кўриш муддатини 20 кундан 7 кунгача қисқартириш зарур», — деди давлат раҳбари.

Аввалроқ уй-жой қурилиш сифатини ошириш масъулияти Очилбой Раматов ва вилоят ҳокимларига юклатилгани, Ўзбекистонда 2021 йил якунигача оғир турмуш шароитига тушиб, бошпанасиз қолган 1000 нафар аёл ижтимоий ижара асосида уй-жой билан таъминланиши ҳамда Шавкат Мирзиёев қурувчи ташкилотларга пандемия даврида берилган имтиёзлар 2021 йил охиригача узайтирилишини таъкидлагани ҳақида хабар берилганди.