Ўзбекистон ички ишлар вазири Пўлат Бобожоновнинг шахсий таркиб бўйича буйруғи билан лавозим тайинловлари амалга оширилди. Бу ҳақда 4 март куни ИИВ матбуот хизмати хабар берди.
Шу вақтгача Сирдарё вилояти Ширин шаҳар ИИБ бошлиғи лавозимида фаолият юритган майор Заҳириддин Садриддинович Собиров вилоятнинг бошқа — Янгиер шаҳри ИИБга бошлиқ этиб тайинланди. Шу кунгача Сирдарё вилояти ИИБ бўлим бошлиғи лавозимида фаолият юритган подполковник Акмал Неъматович Холматов эса Собировнинг ўрнига Ширин шаҳар ИИБ бошлиғи этиб тайинланган.
Подполковник Иқболжон Абдубаннобович Ҳамроқулов Фарғона вилояти Қувасой шаҳар ИИБ бошлиғи лавозимига тайинланган — у жорий тайинловга қадар Фарғона вилояти ИИБ бўлим бошлиғи эди.
Подполковник Ғулом Машарифович Шарипов Хоразм вилояти Урганч тумани ИИБ бошлиғи этиб тайинлангани муносабати билан Хива шаҳар ИИБ бошлиғи лавозимидан озод этилган. Унинг ўрнига шу вақтгача Хоразм вилояти ИИБ Кадрлар бошқармаси бошлиғи ўринбосари — касбий тайёргарликни ташкиллаштириш бўлими бошлиғи лавозимида фаолият юритган подполковник Ботир Наримбоевич Отажонов Хива шаҳар ИИБ бошлиғи этиб тайинланган.
Аввалроқ Бухоро вилояти Когон шаҳар ИИБ бошлиғи лавозимига подполковник Азизбек Жўраевич Ражабов тайинлангани ҳақида хабар берилган эди. У мазкур тайинловга қадар Бухоро вилоят ИИБ Хавфсиз туризмни таъминлаш бошқармаси бошлиғининг ўринбосари — мувофиқлаштириш бўлими бошлиғи лавозимида фаолият юритган.
Изоҳ (0)