AQSh Senati va Vakillari palatasi a’zolari 6-yanvar kuni prezident saylovi yakunlarini tasdiqlashi lozim edi. Saylov 2020-yil kuzida bo‘lib o‘tgan va unda demokrat Jo Bayden g‘alaba qozongan. Uning raqibi, amaldagi prezident Donald Tramp saylov natijalari soxtalashtirilgani haqida bir necha bor bayonot bergan. Saylov yakunlarini tasdiqlash kuni o‘z tarafdorlari tomonidan o‘tkazilgan norozilik namoyishida Tramp saylovdagi mag‘lubiyatni tan olmasligini yana bir bor e’lon qildi. Namoyishga yig‘ilganlarning bir qismi Kapitoliy tomon yurish qilib,uni egallab oldi. To‘qnashuvlar vaqtida bir necha kishi jabrlandi — o‘qotar quroldan yaralangan bir ayol olgan jarohatlari oqibatida vafot etgan.