AQSh Kongressi Vakillar Palatasi xavfsizlik xizmatining Kapitoliyga hujum uyushtirilish xavfi haqidagi ogohlantirishlari sababli 4-mart kuni o‘tkaziladigan majlisni bekor qildi. Bu haqda Washington Post gazetasiga tayanib, “RBK” xabar berdi.
Gazetaning ta’kidlashicha, o‘ng qanot radikallari 4-martni “haqiqiy inauguratsiya kuni” deb atab, o‘sha kuni AQShning sobiq prezidenti Donald Tramp ikkinchi prezidentlik muddati uchun qasamyod keltiradi, degan uydirmalarni tarqatmoqda. Kapitoliy politsiyasining ma’lum qilishicha, ularda ba’zi ekstremistlarning ushbu sanada yana Kongressga kirishga urinish rejalari haqida ma’lumot bor.
Xavfsizlik xizmati ushbu ma’lumotlarning maxfiyligidan kelib chiqib, taxmin qilingan hujum tafsilotlarini batafsil ochiqlamadi. Agentlik o‘z bayonotida “har qanday kuchli tahdidlarga tayyor” ekanligini bildirdi.
Shu bilan birga, AQSh Senati 4-mart kuniga belgilangan yig‘ilishini bekor qilmasligini ma’lum qildi.
Avvalroq AQSh politsiyasiga kelib tushgan ogohlantiruvchi xabarlar va razvedka ma’lumotlari tufayli Vashingtondagi Kapitoliy binosi atrofida xavfsizlik choralari kuchaytirilayotgani haqida xabar berilgandi. Shuningdek, Vashingtondagi tartibni saqlash uchun qo‘shimcha politsiya va Milliy gvardiya zobitlari safarbar etilishi, hamda Kongress binosi atrofiga to‘siqlar o‘rnatilishi ta’kidlangan. Bundan tashqari, Kongress a’zolarining xavfsiz harakatlanishini ta’minlash uchun uchta mahalliy aeroport va temiryo‘l stansiyasiga qo‘shimcha kuchlar jalb qilinadi.
Ma’lumot uchun, Donald Trampni qo‘llab-quvvatlovchilar tomonidan tashkil etilgan “Amerikani qutqarish marshi” nomli norozilik namoyishi ishtirokchilari 6-yanvar kuni poytaxt Vashingtondagi Kapitoliy binosiga bostirib kirgan edi. Trampni qo‘llab-quvvatlash uchun uyushtirilgan namoyish Kapitoliy shturmi bilan tugagan. To‘rt kishi halok bo‘lib, yana bir necha kishi tan jarohati olgan. Politsiya xodimlaridan biri voqea qurboniga aylangan.
Namoyishchilar hujumidan keyin Kapitoliyni ta’mirlash uchun 30 million dollar sarflanishi haqida xabar qilingan.
Izoh (0)