Жанубий Корея ҳукумати COVID-19’га қарши AstraZeneca вакцинаси билан эмланган икки кишининг ўлими юзасидан тергов бошлади. Бу ҳақда Yonhap нашри хабар берди.
Таъкидланишича, Сеулнинг шимоли-ғарбий чегараси яқинидаги Гоян ҳудудида жойлашган касалхонада бир қанча касалликларга чалинган 50 ёшли бемор ушбу вакцина билан бир кун олдин эмланганидан сўнг 3 март куни вафот этди. Тиббиёт ходимлари эркакда юрак етишмовчилиги аломатлари, шунингдек, шу куни эрталаб кучайган нафас қисиши ҳолатини қайд этди.
Цереброваскуляр касаллигига чалинган яна бир 63 ёшли бемор Кёнгидо провинциясининг Пхёнтхэк шаҳридаги касалхонага ётқизилган эди. 27 февраль куни у AstraZeneca билан эмланган, бир кундан кейин унда юқори ҳарорат ва бутун танаси бўйлаб кучли оғриқ кузатилган. 2 март куни бемор бошқа касалхонага кўчирилган ва у ерда 3 март куни пневмония туфайли вафот этган.
Айни пайтда шифокорлар иккала беморнинг ўлими эмлаш ишлари билан қанчалик боғлиқлигини текширмоқда.
Маълумот учун, 2 март куни Канада Миллий маслаҳат қўмитаси AstraZeneca вакцинасини 65 ёшдан ошганларга тавсия қилмаслигини маълум қилди. Бундай қарорга ушбу препаратнинг мазкур ёш гуруҳи учун самарадор экани тўғрисида маълумотлар чеклангани сабаб бўлган.
Худди шу куни Украинанинг собиқ президенти Пётр Порошенко мамлакатга февраль ойи охирида етказиб берилган AstraZeneca препарати, шифокорларнинг фикрига кўра, шубҳали сифатга эга эканлигини айтди. Вакцина билан биринчи бўлиб шифокорлар эмланади. Бироқ уларнинг аксарияти препаратга ишонч йўқлиги сабабли эмланишдан бош тортмоқда.
Аввалроқ Греция COVID-19’га қарши эмланганларда жиддий асоратлар кузатилгани ва 85 ёшли эркак COVID-19’га қарши эмланганидан кейин вафот этгани ҳақида хабар берилганди. Таъкидланишича, эмлашдан саккиз дақиқа ўтгач, эркак ҳушидан кетган. Унга юрак-ўпка реанимацияси (массажи) билан биринчи ёрдам берилганидан сўнг беш дақиқа давомида ўзига келган, аммо яна ҳушидан кетган.
Норвегияда эса Американинг Pfizer компанияси ва унинг Германиядаги шериги BioNTech томонидан ишлаб чиқилган коронавирусга қарши вакцина билан эмланган икки киши вафот этган. Норвегия дори воситалари агентлиги маълумотларига кўра, иккала қурбон ҳам қариялар уйларидан бирида яшаган.
Шунингдек, АҚШда 21 январь куни COVID-19’га қарши эмланган бемор орадан бир неча соат ўтиб вафот этгани ҳақида хабар берилганди. Унинг вафоти юзасидан ҳуқуқни муҳофаза қилиш органлари текширув бошлаган.
Изоҳ (0)