Деярли барча даврларда футбол мухлисларини ўйинчиларнинг фаолиятидан ташқари уларнинг шахсий ҳаёти ҳам қизиқтириб келган. Ўтган гал дунёнинг энг келишган футболчилари ҳақида суҳбатлашган эдик, бу сафар ҳам чирой ва гўзалликнинг жуда нисбий тушунча эканлигини инкор этмаган ҳолда чарм тўп усталарининг энг гўзал рафиқалари ҳақида фикр юритишга қарор қилдик.
Шакира (Херард Пикенинг рафиқаси)
Колумбияда бадавлат оилада дунёга келган Шакира ва футболчи Херард Пике ЖАРда ўтказилган 2010 йилги Жаҳон Чемпионатида танишиб қолган. Чемпионатнинг мадҳиясига айланган «Waka Waka» қўшиғига клип суратга олиш жараёнида кўплаб футболчилар сингари Пике ҳам иштирок этади. Шу тариқа иккала ёшнинг севги ҳикояси бошланади. Бироқ улар 2011 йилнинг март ойига келибгина ўз муносабатларини расман эълон қилади. Ҳозирда жуфтлик икки нафар ўғил фарзандни вояга етказиш билан бирга бахтли ҳаёт кечирмоқда. Бунга уларнинг ўртасидаги ўн ёшлик фарқ заррача ҳам халақит бераётгани йўқ — Шакира 44, «Барселона» ҳимоячиси эса 34 ёшда.
Антонелла Рокуццо — Лионель Мессининг рафиқаси
Антонелла 1988 йилда Аргентинанинг Росарио шаҳрида ишчилар оиласида таваллуд топган. Месси ва унинг оилалари доимо дўстона муносабатларда бўлган. Лионель 2009 йилда ўз танловини оммага эълон қилади ва маҳбубасини Испания олиб келади. Жуфтликка яқин инсонларнинг сўзларига кўра Антонелла нафақат Мессининг руҳий ҳолатига, балки унинг характерига ҳам ижобий таъсир ўтказган. 2017 йилда никоҳ маросимини ўтказган жуфтлик Тиаго, Матео ва Чиро исмли уч нафар фарзандни тарбияламоқда. Месси бўш вақтларини фақат оила даврасида ўтказишга одатланган, ҳатто дўстларини ҳам уйига таклиф қилади.
Жоржина Родригес — Криштиану Роналдунинг қайлиғи
Родригес 1994 йилда Испанияда туғилган бўлса-да, ўзини аргентиналик деб ҳисоблайди. Раққоса ва модель сифатида танилган Жоржина 2016 йилдан бери Криштиану Роналду билан ҳаёт кечириб келмоқда. Жуфтликнинг 3 ёшли Алана Мартина исмли қиз фарзанди бор. Шунингдек, у португалияликнинг суррогат (маълум бир аёл бошқа шахс ёки оила учун фарзандни дунёга келтиради) онадан туғилган уч нафар фарзандига ҳам оналик қилади. 2019 йилнинг ноябрь ойида жуфтликнинг махфий равишда никоҳдан ўтгани ҳақида хабарлар янграганди. Бироқ бу хабар ҳалигача расман тасдиқлангани йўқ.
Пилар Рубио — Серхио Рамоснинг рафиқаси
Телебошловчи, модель ва актриса сифатида Испанияда катта ном қозонган Пилар Рубио 1978 йилда Торрехон-де-Ардос шаҳрида туғилган. У Рамос билан Испаниядаги хайрия тадбирида учрашиб қолади, Пилар биринчи бўлиб Серхионинг ёнига келиб, ундан клуб рамзи туширилган либос совға қилишни сўрайди. Шу тариқа уларнинг севги қиссаси бошланади. Жуфтлик 2019 йилга келиб, тўй маросимини ўтказаётган вақтда уларнинг уч нафар фарзанди бор эди. 2020 йилнинг июнь ойида эса Пилар Рамосга тўртинчи ўғилни совға қилди.
Сара Карбонеро — Икер Касильяснинг рафиқаси
1984 йилда туғилган Сара 2016 йилда «Реал» ва Испания афсонаси Икер Касильясга турмушга чиқади, жуфтлик бунгача ҳам 6 йил давомида яқин муносабатларда бўлган. 2009 йилда дунёнинг энг мафтункор спорт журналисти деб топилган Карбонеро ва Касильяснинг ҳаётига фақат ҳавас қилиш мумкин эди. Аммо 2019 йилда улар ҳаётнинг катта синовига дуч келади: Касильяс миокард инфарктини бошдан кечирган бўлса, Сарага саратон ташхиси қўйилади. Бироқ жуфтлик ўзида куч топади ва ҳаётга қайтади. Сара муваффақиятли операция қилинади, Икер эса ҳатто футболчилик фаолиятини ҳам тиклашга эришади. Бу вақтга келиб, уларнинг икки нафар ўғил фарзанди бор эди.
«Менинг баъзи нарсаларга бўлган қарашларим ўзгарди, кўп нарсаларни қадрига етадиган бўлдим», — деганди Касильяс ўшанда.
Мавзуга доир: Дунёнинг энг келишган 5 футболчиси (фото)
Изоҳ (0)