Туркманистонда мамлакат пойтахтининг 140 йиллигини нишонлашга фаол тайёргарлик давом этмоқда. 26 февраль куни Вазирлар Маҳкамасининг мажлисида президент Гурбангули Бердимуҳамедов яна бир бор Ашхободнинг юбилейига режалаштирилган тантаналар масаласига катта эътибор қаратди, деб ёзмоқда «Хроника Туркменистана».
Байрам муносабати билан бир қатор янги бинолар очилади, концерт ва кўргазмалар ташкил этилади, фильмлар суратга олинади ва 400 та янги шаҳар автобуслари йўлга қўйилади. Бундан ташқари, Бердимуҳамедов 25 май — Шаҳар кунида туғилган биринчи ўғил болага Пайтагт (Пойтахт) ёки Ашхобод исмини, қиз болага эса Мержен (Маржон) ёки Май исмини беришни буюрди.
«Бу пойтахтга муҳаббат, унинг тарихига ҳурмат, халқнинг бахтли ҳаётидан фахрланишни англатувчи ўзига хос белги бўлади. Янги туғилган болаларга бундай совға ҳадя қилиш ушбу лаҳзаларни уларнинг оилалари учун унутилмас онга айлантиради», — деди президент.
Шунингдек, Бердимуҳамедов 8 март — Халқаро хотин-қизлар куни муносабати билан ўз номидан Туркманистон аёлларига 60 манатдан (давлат курси бўйича 17,1 доллар ёки «қора бозор» курси бўйича 1,9 доллар) совға қилишни буюрди.
Пул совғаларини мулкчилик шаклидан қатъи назар, муассаса ва ташкилотларда ишлайдиган, пенсия, нафақа ва стипендия оладиган аёллар ҳамда мактаб ўқувчилари ва болалар боғчаси тарбияланувчилари олади. Уй бекалари ва якка тартибдаги тадбиркорларга бундай совға берилмайди.
Маълумот учун мамлакатда ўтган йили ҳам аёлларнинг ҳар бирига 60 манатдан совға қилинган эди, ўшанда бу миқдор 3 долларга тенг бўлган. Кейинчалик, ҳукумат якка тартибдаги тадбиркор сифатида рўйхатдан ўтган пенсионерлардан совғаларни қайтаришни талаб қилгани маълум бўлган.
Аввалроқ Бердимуҳамедов Ашхобод юбилейи ва Туркманистон мустақиллигига тайёргарлик кўриш ишларидан норози бўлгани ҳақида хабар берилганди. Президент Гурбангули Бердимуҳамедов мустақилликнинг 30 йиллиги ва Ашхободнинг 140 йиллигини нишонлашнинг юқори ташкилий савиясини таъминлаш учун барча чораларни кўришни қатъий талаб қилган ва яқинлашиб келаётган тантаналар ҳокимият даврининг таъсирчан ютуқлари ҳамда муваффақиятларини акс эттириши кераклигини таъкидлаган.
Эслатиб ўтамиз, Туркманистон пойтахтида Тошкент номли истироҳат боғи қурилиши, Абдулазиз Комилов Туркманистон президенти Гурбангули Бердимуҳамедов билан учрашгани ҳамда Туркманистон президенти ўз ўғлини бош вазир ўринбосари этиб тайинлагани ҳақида хабар берилганди.
Изоҳ (0)