АҚШнинг собиқ президенти Дональд Трамп 2024 йилда мамлакат президентлиги учун номзодини қўйиши мумкинлигига ишора қилди. У келгуси сайловларда ҳам ғалаба қозонишига ва 2020 йилда бўлиб ўтган президентлик сайловларида ғолиб чиққанига ишонишини билдирди, деб ёзмоқда «Коммерсантъ».
«Ким билсин, эҳтимол, мен демократларни учинчи маротаба мағлуб этишга қарор қиларман», — деди Трамп CPАC консерватив конференцияси иштирокчилари олдида сўзлаган нутқида. Унинг мазкур нутқи январь ойида президентлик лавозимидан истеъфога чиққандан бери омма олдида биринчи чиқиши бўлди.
Трамп сиёсатда қолиш ниятида эканини тасдиқлади. «Ушбу зал ва бутун мамлакат кўпдан кўп ажойиб дўстлар, консерваторлар ва фуқароларга тўла. Мен сизнинг ҳузурингизда шуни маълум қилиш учун турибман: тўрт йил олдин биз сиз билан бошлаган ёқимли саргузашт ҳали бери тугамайди...», — деди у. Собиқ президентнинг сўзларига кўра, ҳаракат «эндигина бошланмоқда ва охир-оқибат биз ғалаба қозонамиз». У Республикачилар партиясининг қўллаб-қувватлашига умид қилишини таъкидлади ва янги сиёсий партия тузилишини рад этди. Январь ойида The Wall Street Journal Трампга яқин одамлар орасида янги партия тузиш бўйича муҳокамалар ҳақида хабар берган эди.
АҚШнинг собиқ президенти унинг ўрнини эгаллаган Жо Байден ва Демократик партия бошқа вакилларининг сиёсатини, хусусан, энергетика масалаларида танқид қилди. Собиқ президентнинг сўзларига кўра, демократларнинг қарорлари АҚШни Россия ва Яқин Шарқ белгилайдиган нефть нархига қарамликка олиб келади.
Маълумот учун Дональд Трамп 2017 йилдан 2021 йилгача АҚШ президенти бўлган. У фаолияти давомида икки маротаба импичмент эълон қилинган илк президентга айланган: 2019 йилда Вакиллар палатаси уни ваколатини суиистеъмол қилишда ва АҚШ Конгрессининг ишига аралашишда, 2021 йилда эса қўзғолонга даъват қилганликда айблаган. Сенат иккала айблов бўйича ҳам Трампни оқлаган.
Изоҳ (0)