Швейцариянинг Swissmedic фармакология институти ва миллий дори-дармон регулятори марказига коронавирусга қарши вакцинация бошлангандан буён, эмлашдан сўнг юз берган ўлим ҳолати тўғрисида 16 та хабар келиб тушди. Бу ҳақда регулятор расмий веб-сайтида маълум қилинди, деб ёзмоқда «РБК».
«Гарчи эмлаш ва ўлим вақтининг тасодифан бир-бирига мос келишига қарамай, мазкур ўлимларга вакцина сабаб бўлганини аниқ кўрсатувчи ҳеч нарса йўқ», — дейилади хабарда.
24 февраль ҳолатига кўра, Swissmedic коронавирусга қарши эмлашдан сўнг юзага келган ножўя ҳолатлар ҳақидаги 364 та ҳисоботни таҳлил қилган. Улардан 199 таси Pfizer ва BioNTech, 154 таси Moderna вакциналари билан эмланишдан сўнг кузатилган.
«Эмлашдан сўнг 95 та ҳолатда препаратни қабул қилганлар тиббий нуқтаи назардан ‘жиддий’ оқибатларга дуч келган, уларнинг бир қисми касалхонага ётқизилган. Бу ерда гап бош оғриғи, COVID-19 билан касалланиш ва аллергик реакциялар, шу жумладан, анафилактик шок ҳақида бормоқда», — деб хабар беради Swissmedic.
Шикоятларнинг тахминан 74 фоизи «жиддий эмас» деб таснифланган. Ушбу ҳолатларда шприц ўрнида қизариш, шиш ва қичишиш, шунингдек, бош оғриғи, иситма ҳамда титроқ ҳақида шикоят қилинган.
Шу билан бирга, Swissmedic COVID-19 вакцинасининг фойдаси потенциал хавфдан устунлигини таъкидлаган.
Аввалроқ Греция COVID-19’га қарши эмланганларда жиддий асоратлар кузатилгани ва 85 ёшли эркак COVID-19’га қарши эмланганидан кейин вафот этгани ҳақида хабар берилганди. Таъкидланишича, эмлашдан саккиз дақиқа ўтгач, эркак ҳушидан кетган. Унга юрак-ўпка реанимацияси (массажи) билан биринчи ёрдам берилганидан сўнг беш дақиқа давомида ўзига келган, аммо яна ҳушидан кетган.
Норвегияда эса Американинг Pfizer компанияси ва унинг Германиядаги шериги BioNTech томонидан ишлаб чиқилган коронавирусга қарши вакцина билан эмланган икки киши вафот этган. Норвегия дори воситалари агентлиги маълумотларига кўра, иккала қурбон ҳам қариялар уйларидан бирида яшаган.
Шунингдек, АҚШда 21 январь куни COVID-19’га қарши эмланган бемор орадан бир неча соат ўтиб вафот этгани ҳақида хабар берилганди. Унинг вафоти юзасидан ҳуқуқни муҳофаза қилиш органлари текширув бошлаган.
Исроилда эса коронавирус инфекциясига қарши эмланган 13 кишида вақтинчалик юз фалажи юзага келган. Беморлардан бирининг маълум қилишича, у эмланганидан бир неча дақиқа ўтиб, ияги ва оғзида ғалати ҳиссиётни сезган.
Изоҳ (0)