АҚШ Эрон билан дипломатик алоқаларга очиқ, аммо Теҳронга қарши жорий этилган бир томонлама санкцияларни юмшатмоқчи эмас. Бу ҳақда Оқ уй матбуот котиби Жен Псаки президент Жо Байден билан биргаликда Техасга кетиш мобайнида журналистлар учун самолётда ўтказган брифингда маълум қилди, деб ёзмоқда «ТАСС».
«АҚШ дипломатик алоқалар учун очиқ ва музокаралар столига ўтириб, ҳамкорларимиз, шунингдек, Эрон билан ҳам «5+1» форматида (БМТ Хавфсизлик Кенгашининг бешта доимий аъзоси ва Германия) маслаҳатлашувлар ўтказишга тайёр. Аммо Биз Эронга қарши эълон қилинган санкцияларни юмшатиш чораларини кўрмаяпмиз», — деди матбуот котиби Жен Псаки.
Эслатиб ўтамиз, 2020 йил, 11 январь куни собиқ президент Дональд Трамп Эронга қарши янги санкциялар жорий қилиш ҳақдаги тегишли қарорни имзолаган эди. Дональд Трамп мазкур санкцияларни 8 январь куни Эроннинг Ироқдаги АҚШ ҳарбий базаларига берган зарбаларига жавобан эълон қилган.
АҚШ ва Эрон ўртасидаги кескинлик АҚШ томонидан Эроннинг энг нуфузли генерали Қосим Сулаймоний ўлдирилгач, янада кучайди. Бунга жавобан Эрон 2020 йил 8 январь куни АҚШнинг Ироқда жойлашган иккита ҳарбий базасига ракета зарбаларини берди.
Шунингдек, 2019 йил декабрь ойида АҚШ Эроннинг кемада юк ташувчи IRISL Group компанияси, унинг Хитойдаги шўъбаси E-Sail Shipping Company Ltd, шунингдек, Эроннинг Mahan Air авиакомпаниясига нисбатан санкциялар жорий этган. Таъкидланишича, санкцияларни жорий этиш учун уларнинг «оммавий қирғин қуролларини тарқатиш билан боғлиқ» транспорт ташувларини амалга оширгани асос бўлган.
Бундан ташқари, давлат департаментидан маълум қилишларича, «қуролларни Яманга олиб киришга ёрдам берган» саккизта Эрон тузилмалари ҳам санкция таъсири остига тушган.
Изоҳ (0)