Redmi компанияси бир вақтнинг ўзида бешта янги қурилмаси — Redmi K40, K40 Pro, K40 Pro+ смартфонлари, RedmiBook Pro ноутбуги ва Redmi AirDots 3 симсиз наушнигининг тақдимотини ўтказди, деб хабар беради «Afisha.uz».
Redmi AirDots 3
Тақдимотда намойиш этилган охирги қурилмадан бошлаймиз. Redmi AirDots 3 ўзидан олдинги қурилма каби ташқи кўринишга эга бўлиб, шаклида бир оз ўзгариш мавжуд. Наушник Bluetooth 5.2 симсиз интерфейсини, aptX Adaptive кодекини қўллаб-қувватлайди, сенсор ва Xiaomi, Google ҳамда Apple овозли ёрдамчилари орқали бошқарилади.
Ишлаб чиқарувчининг маълум қилишича, наушниклар бир марта қувватланиш орқали етти соатгача ишлай олади, унинг ғилофи эса ушбу вақтни 30 соатгача узайтириб беради. Кейснинг ўзи USB Type-C порти орқали қувватланади.
Хитойда Redmi AirDots 3 4 мартдан пушти, кўк ва оқ рангларда 31 доллар нархида сотувга чиқади.
RedmiBook Pro 15 ва 14
Redmi’нинг янги ноутбуклари яхлит металл корпусдан ишланган бўлиб, рақобатчиларидан арзон бўлмаган 11-авлод Intel Core процессорларида ишлайди.Катта модель 90 герцли янгиланиш частотасига эга экран ва 3.2K сифатда 242 ppi пиксель зичлигига эга бўлган. Харидорларга 11-авлод Intel Core i5 ёки Core i7, 2 гигабайтли Nvidia GeForce MX450 видеокарта, 16 гигабайт тезкор ва 512 гигабайт ёки 1 терабайт ички хотирали версиялар тақдим этилади.
Экрани диагонали 14 дюймга тенг кичик модель эса 2.5K сифатни қўллаб-қувватловчи 60 герцли частотага эга. Бошқа техник жиҳатлари катта моделники каби.
Нархлар: Intel Core i5 процессорига эга базавий RedmiBook 15 нархи 775 долларга баҳоланган, RedmiBook 14 нархи эса 700 доллардан бошланади.
Redmi K40, K40 Pro, K40 Pro+
Redmi компанияси янги учта қурилмасининг барчаси замонавий дизайнга эга флагман моделлар ҳисобланади.
Аппаратлар ингичка Samsung Super AMOLED экранларнинг сўнгги авлоди — E4 билан жиҳозланган (Galaxy S21’га ҳам худди шунақаси ўрнатилган) бўлиб, фронтал камераси ўрнида кичик қирқим мавжуд. У нафақат 120 герцли янгиланиш частотаси билан, балки 360 герцли сенсор қатлам частотаси билан ҳам мақтана олади. Бундан ташқари, ёруғликнинг юқори даражаси 1300 нитни ташкил этади. Шунингдек, уларда iPhone’лардаги TrueTone каби ранглар ҳароратини автоматик режимда бошқарувчи қўшимча датчик ҳам бор.
K40 линейкасидаги моделларга сиғими 4520 мА/соатга тенг аккумуляторлар ўрнатилган бўлиб, улар 33 ваттли тезкор қувватланиш функциясига эга. Бундан ташқари, телефонлар ҳажмли Dolby Atmos овозини қўллаб-қувватловчи иккита стереодинамикка эга, IP53 стандарти бўйича намликдан ҳимояланган ва қувватлантириш тугмасида бармоқ изи сканери мавжуд. Қурилмалар қалинлиги — 7,8 миллиметр.
Redmi K40 сериясидаги смартфонлар бир-биридан фақат процессорлари ва камералари билан фарқ қилади. Кичик моделнинг асосий датчиги — 48 мегапикселли Sony IMX582, K40 Pro’ники — 64 мегапикселли Sony IMХ686, K40 Pro+ моделиники эса 108 мегапикселли Samsung HM2. Стандарт K40 ичига Snapdragon 865 процессори ўрнатилган бўлса, K40 Pro ва K40 Pro+’дан Snapdragon 888 чиплари ўрин олган.
Шунингдек, смартфонлар қўшимча камераларга ҳам эга бўлган: 5 Мп (50 миллиметрли фокус масофали объектив), 8 Мп (119 даража бурчак кенглигига эга ўта кенг бурчакли объектив) ва 20 Мп фронтал камера.
Redmi K40 линейкасининг Хитойдаги нархлари:
- Redmi K40 6/128 Гб — 310 доллар;
- Redmi K40 8/128 Гб — 340 доллар;
- Redmi K40 8/256 Гб — 387 доллар;
- Redmi K40 12/256 Гб — 418 доллар;
- Redmi K40 Pro 6/128 Гб — 433 доллар;
- Redmi K40 Pro 8/128 Гб — 464 доллар;
- Redmi K40 Pro 8/256 Гб — 510 доллар;
- Redmi K40 Pro+ 12/256 Гб — 572 доллар.
Изоҳ (0)