Huawei букланувчи экранга эга Маtе Х2 флагманини тақдим этди (видео)

Хитойнинг Huawei компанияси букланувчи иккита экранга эга флагмани — Маtе Х2’ни тақдим этди, деб хабар беради Hi-Tech.Mail.ru.

Бу Huawei’нинг букланадиган экранга эга иккинчи флагмани ҳисобланади, фақат бундан олдинги Маtе Х’нинг конструкцияси бошқача эди — битта букланадиган дисплей йиғилган ҳолатда ҳам ташқи томонида қоларди. Шу каби ҳолатда қўнғироқларни амалга ошириш ёки ёзиш, очилган ҳолатда эса браузердан фойдаланиш ёки видео томоша қилиш мумкин эди.

Ташқи томондаги дисплей зарбаларга у қадар бардошли эмас, шу сабабли Маtе Х2’да бошқа форматдан фойдаланилган. Унинг асосий 8 дюймли OLED дисплейи ичкарига букланади, ташқи томондаги экран эса (6,45 дюйм) оддий вазифалар учун. Иккала экран ҳам 90 герцли янгиланиш частотасини қўллаб-қувватлайди. Huawei’нинг ваъда қилишича, янги флагманда букланадиган конструкция анча мустаҳкам ва узоқ муддат хизмат қилади.

Кўриниши жиҳатдан Маtе Х2 ўзидан олдинги моделдан у қадар катта фарқ қилмайди — бу қўл остида ихчам корпусга эга катта экранли қурилма бўлишини хоҳлаган қиммат гаджет. Бу каби дисплейда браузерда ишлаш, бир вақтнинг ўзида бир нечта дастурларни очиш, ўйин ўйнаш, роликлар кўриш, ўқиш ва бошқа кўплаб амалларни бажариш мумкин.

Смартфон Kirin 9000 флагман процессорида ишлайди — бу каби чип Маtе 40’га ҳам ўрнатилган. Унга 8 Гб тезкор ва 256/512 Гб ички хотира ўрнатилади, аккумулятор сиғими 4500 мА/соатга тенг бўлиб, 55 ваттли тезкор қувватланиш функциясига эга.

Эътиборли жиҳати — унинг нархида. Букланадиган экранга эга смартфон Хитойда 25 февралдан 17 999 юань (2800 АҚШ доллари) нархида сотувга чиқади.

Аввалроқ LG қурилма экрани корпусдан тортиб чиқариладиган «рулон-смартфон» тайёрлаётгани тўғрисида хабар берилганди.