АҚШнинг Суриядаги Эронга алоқадор объектларга ҳаво зарбасини бериши минтақадаги зўравонликларни янада кучайтириб юбориши мумкин. Бу ҳақда Эрон президент аппарати ҳузуридаги Стратегик тадқиқотлар маркази халқаро лойиҳасининг директори Диако Ҳусайний «ТАСС»га маълум қилган.
«Агар яқин вақт ичида ядро келишуви бўйича музокаралар қайта бошланмаса ёки ушбу масалага қайтилмаса, у ҳолда бундай ҳаракатлар икки давлат ўртасидаги вазиятнинг янада кескинлашишига олиб келиши мумкин, бу дипломатик муносабатларни янада мураккаблаштиради», – деган у.
Ҳусайнийнинг сўзларига кўра қисқа давр оралиғида шошмашошарлик билан чиқарилган хато қарор томонларнинг ядро келишувига риоя этиш бўйича келишувни қайтадан имзолаш эҳтимолини кескин камайтиради.
«Бироқ Жо Байден президентлигининг илк давриданоқ икки давлат ўртасидаги ишончсизликни янада ошириб юбормоқчи. Бу АҚШнинг ташқи сиёсатида ижобий ўзгаришлар бўлиши ҳақидаги умидларни сўндиради», — дейди Ҳусайний.
АҚШ 26 февралга ўтар кечаси Сурия – Ироқ мамлакатларининг чегарасидаги ҳудудга авиазарба йўллаган. Пентагон ушбу ҳаракатнинг Ироқда АҚШ вакиллари ва ИШИД террорчиларига қарши кураш олиб борган коалицияга уюштирилган ҳужумга жавоб эканлигини билдирган.
АҚШ Эрон билан алоқадор гуруҳларга қаршли объектларга ҳужум қилган. Сурия ташқи ишлар вазири мазкур ҳужумни қоралаган, шунингдек, бу каби ҳаракатлар халқаро ҳуқуқ меъёрларига зид эканлиги ва Яқин Шарқ минтақасидаги вазиятни янада мураккаблаштиришидан хавотирдалигини маълум қилган.
Изоҳ (0)