Тошкент вилоятида ўчиб қолган газ ҳисоблагичларни ўрнатиш вақтида далолатномалар нотўғри расмийлаштирилгани аниқланди

Истеъмолчилар ҳуқуқларини ҳимоя қилиш агентлиги Тошкент ва Янгийўл туманлари аҳолиси нима сабабдан табиий газ таъминотидан узиб қўйилганига ойдинлик киритди. Бунга электрон газ ҳисоблагичларни ўрнатиш жараёнида далолатномалар нотўғри расмийлаштирилгани сабаб бўлган, деб хабар беради агентлик матбуот хизмати.

23—24 февраль кунлари ижтимоий тармоқларда истеъмолчиларнинг табиий газ таъминотидан узиб қўйилгани ҳамда электрон газ ҳисоблагич ўрнатилган хонадонларда газнинг автоматик тарзда ўчиб қолиши ва тўлов мавжуд бўлганига қарамай тармоққа қайта уланиш муаммолари кўплаб кескин муҳокамаларга сабаб бўлган.

Аҳоли газ таъминоти идораларида эрта тонгдан кечгача навбатда турса ҳам муаммоси ҳал бўлмай қолгани учун бундай эътироз билдиришга мажбур бўлган.

Истеъмолчилар ҳуқуқларини ҳимоя қилиш агентлиги ўз ваколати доирасида Тошкент вилоятининг Тошкент ва Янгийўл туманларидаги вазиятни жойига чиққан ҳолда ўрганиб, муаммоларни баратараф қилиш юзасидан бир қатор тезкор тадбирларни амалга оширган.

Муаммо сабабларини ўрганган ҳолда, агентликнинг Тошкент вилояти ҳудудий тузилмаси томонидан «Ҳудудгаз Тошкент» газ таъминоти филиалига табиий газни етказиб беришда истеъмолчиларнинг ортиқча оворагарчилигига сабаб бўлувчи омилларни тезкор равишда бартараф қилиш тўғрисида сўров хати юборилган ва шу куннинг ўзида 150 нафарга яқин истеъмолчининг газ таъминотига қайта уланишига амалий ёрдам кўрсатилган.

Бундан ташқари, Истеъмолчилар ҳуқуқларини ҳимоя қилиш агентлиги ўрнатилган электрон газ ҳисоблагичларнинг автоматик тарзда ўчиб қолиши бўйича мурожаатларни ўрганиш доирасида электрон газ ҳисоблагичларни ўрнатиш жараёнида далолатномалар нотўғри расмийлаштирилгани ва мазкур далолатнома асосида CСВ базасига маълумотлар нотўғри киритилганини аниқлаган.

Бунинг оқибатида бир нечта хонадондаги ҳисоблагичлар бўйича серия рақами базага бир хил киритилган бўлиб, бу ҳолат битта қарздор абонент билан бир қаторда, бошқа ҳақдор абонентларнинг ҳам тармоқдан ўчирилишига олиб келмоқда.

Аввалроқ Ўзбекистонда янги газ ҳисоблагичларни жорий этиш тезлаштирилиши маълум қилинганди.